३ जेष्ठ,काठमाडौ। देशभरको नजर अडिएको काठमाडौ महानगरपालिकाको मेयरमा स्वतन्त्र उम्मेद्वार बालेन्द्र साहले मतान्तर थप फराकिलो बनाउदै लगेका छन् ।
उनी मुख्य प्रतिस्पर्धी भन्दा झन्डै दोब्बरले अगाडि रहेका छन् ।
महानगरको जारी मतगणनाको पछिल्लो मत अनुशार काठमाडौं महानगरपालिकाको मेयर पदका स्वतन्त्र उम्मेदवार बालेनले अग्रता थप फराकिलो बनाएका छन् ।
बालेनले १० हजार ७९७ मत पाएका छन् ।
उनी नेकपा एमालेका उम्मेदवार केशव स्थापित भन्दा ५ हजार १० मत अन्तरले र नेपाली कांग्रेसकी उम्मेदवार सिर्जना सिंहभन्दा ५ हजार ७२३ मत अन्तरले अगाडि छन् ।
केशव स्थापितले ५ हजार ७८७ र सिर्जना सिंहले ५ हजार ७४ मत पाएकी छन् । यस्तै राप्रपाका उम्मेदवार मदनदास श्रेष्ठले ८४५, स्वतन्त्र उम्मेदवार सुमन सायमीले ६११ मत र विवेकशील साझा पार्टीकी समिक्षा बास्कोटाले १०७ मत पाएकी छन् ।
उपमेयर पदमा भने नेकपा एमालेकी उम्मेदवार सुनिता डंगोलले पनि मतान्तर बढाउदै लगेकी छिन् । उनले अहिलेसम्म ९ हजार ४१९ मतसहित अग्रता कायम गरेकी छन् ।
सत्ता गठबन्धनबाट उपमेयरको साझा उम्मेदवार बनेका एकीकृत समाजवादीका रामेश्वर श्रेष्ठले २ हजार ५७५ मत पाएका छन् । राप्रपाकी उम्मेदवार विनिता मगैयाको पक्षमा १ हजार ७०९ र विवेकशील साझा पार्टीकी कीर्ति तुलाधरको पक्षमा ४०४ मत पाएकी छन् ।
काठमार्डामा वडा नम्बर १ र २ को मतगणनाको नतिजा सार्वजनिक भइसकेको र वडा नम्बर ३,४,५,६,३१ र ३२ वडाको मत गणना कार्य जारी रहेको छ । काठमाडौँ–१ मा एमालेका भारतलाल श्रेष्ठ र २ मा एमालेकै राजेन्द्रकुमार श्रेष्ठ वडाध्यक्षमा विजयी भइसकेका छन्।
निर्वाचन आयोगको विवरणअनुसार १५ हजार ५५१ मत गणना हुँदा ५१२ मत बदर भएको छ। मधुरो छाप, डबल छाप, घेराभन्दा बाहिर छाप लगाउँदा मत बदर भएको बताइएको छ। मतगणनामा उपस्थित गणकका अनुसार बदर भएको मतपत्रमा अधिकांश मत ‘लौरो’को रहेको छ।
