२२ साउन ,एजेन्सी ।
बंगलादेशमा पेट्रोल र डिजेलको मूल्यमा भएको भारी वृद्धिपछि देशभर हिंसात्मक प्रदर्शन भएको छ । यो प्रर्दशनले आर्थिक संकटसँग जुधिरहेको श्रीलंकाको स्मरण गराएको छ । केही महिना पहिला श्रीलंकामा पनि इन्धन अभाव र मूल्यबृद्धिका कारण हिंसात्मक प्रर्दशन भएको थियो । शुक्रबार सरकारले पेट्रोलको भाउ ५१.७ प्रतिशत तथा डिजेलको भाउ ४२.५ प्रतिशतले बढाएको थियो । त्यसैको विरोधमा मानिसहरुको सरकारविरुद्ध प्रदर्शन गरेका हुन् ।
तेलको मूल्यवृद्धिको विरोधमा भएको प्रदर्शनको क्रममा धेरै सहरमा आगजनी र ढुङ्गा प्रहारका घटना भएका थिए । प्रदर्शनकारीलाई नियन्त्रणमा लिन प्रहरीलाई पनि बल प्रयोग गर्नुपरेको थियो । शनिबार तेलको मूल्यवृद्धिको निर्णय लागू हुनुभन्दा पहिला नै ठूलो संख्यामा मानिसहरु देशभरका पेट्रोल पम्पमा पुगेका थिए । यससँगै पेट्रोल पम्पहरुले पेट्रोलियम पदार्थको बिक्री रोकेका थिए । त्यसपछि प्रदर्शनले उग्र रुप लिएको हो ।
प्रदर्शनकारीहरुले पेट्रोलियम पदार्थको मूल्य बढेसँगै लाखौंको रोजीरोटीमा असर परेको बताएका छन् । बंगलादेशको ऊर्जा संकटको असर बिद्युत् आपूर्तिमा पनि परेको छ । अहिले बंगलादेशको केही क्षेत्रमा दैनिक १३ घण्टासम्मको विद्युत् कटौती भइरहेको छ । यसैबीच बंगलादेशको ऊर्जा मन्त्रालयले भने विश्वव्यापी अवस्थालाई मध्यनजर गर्दै तेलको मूल्यवृद्धि रोक्न नसकिने बताएको छ । मन्त्रालयले आफूहरुसँग कुनै विकल्प नभएको भन्दै मानिसहरुलाई धैर्यधारणको लागि आग्रह गरेको छ ।
बंगलादेश पेट्रोलियम कर्पोरेसनले जुलाईसम्मको ६ महिनामा आठ अर्ब रुपैयाँ घाटा बेहोरेको ऊर्जामन्त्री नसरुल हमिदले भनेका छन् । ‘नयाँ मूल्य सबैले धान्न सक्दैनन् । तर, हामीसँग अर्को उपाय थिएन । जनताले धैर्य गर्नुपर्छ’, उनले भनेका छन् । विश्व बजारमा कच्चा तेलको मूल्य घटेमा देशमा तेलको मूल्य परिवर्तन हुने उनको भनाइ छ ।
यसै क्रममा प्रमुख विपक्षी दल बंगलादेश नेसनलिस्ट पार्टीका महासचिव मिर्जा फखरुल इस्लाम आलमगीरले यसलाई जनताको घाउमा नुन छर्केको बताएका छन् । उनले मूल्यवृद्धिले बंगलादेशको अर्थतन्त्रमा निकै नराम्रो असर पर्ने बताए । लगातार नौ महिनामा ६ प्रतिशतमा रहेको बंगलादेशको मुद्रास्फीति जुलाईमा बढेर ७.४८ प्रतिशत पुगेको छ ।
