२२ साउन, एजेन्सी ।
पेरिस सेन्ट जर्मेन (पिएसजी) ले नयाँ सिजनको फ्रेन्च लिग वानमा विजयी सुरुवात गरेको छ । शनिबार राति भएको खेलमा पिएसजीले घरेलु टोली क्लेरमन्ट फुटमाथि ५–० को सानदार जित निकाल्यो । पिएसजीको जितमा लियोनल मेसीले दुई, नेयमार, अचरफ हाकिमी र मार्किन्होसले एक–एक गोल गरे ।
खेलको नौँ मिनेटमा नेयमारले गोल गरी पिएसजीलाई सुरुवाती अग्रता दिलाएका थिए । त्यसपछि हाकिमीले २६ औँ मिनेटमा गोल गर्दै पिएसजीको अग्रता दोब्बर पारे । मार्किन्होसले ३८ औँ मिनेटमा गोल गरी पिएसजीलाई ३–० ले अगाडि बढाए । मेसीले ८० र ८६ औँ मिनेटमा गोल गरी पिएसजीलाई सानदार जित दिलाए । मेसीले हिजो गरेको दोस्रो गोलको भने अहिले विश्वभरबाट प्रशंसा भइरहेको छ ।
उनले बाइसाइकल किकबाट गरेको आकर्षक गोलले यतिबेला सामाजिक सञ्जालमा व्यापक चर्चा पाइरहेको छ । उनको यो गोलमा विपक्षी टीमका समर्थकले समेत मेसीको नाममा हुटिङ गरेका थिए । साथीले हावामा पास दिएको बललाई छातीले रोकेर मेस्सीले बाइसाइकल किक हान्दै आफ्नो पछाडि रहेको गोलपोष्टमा छिराएका थिए । जसको सुईको समेत गोलकिपरले पाउन सकेनन् ।
उनले बाइसाइकल किकबाट गोल गर्दा स्टेडियमभित्र मेसी मेसी को नारा गुञ्जिएको थियो । क्लेयरमन्टका समर्थकहरुले समेत उठेर मेसीको समर्थनमा ताली बजाए । क्लेयरमन्टको अफिसियल ट्विटर एकाउन्टमा ‘ह्वाट अ गोल बाइ मेसी’ भन्दै भिडियो पोष्ट गरिएको थियो । खेलपछि पीएसजीका प्रमुख प्रशिक्षक क्रिस्टोफे गाल्टियरले भने, ‘मेसीसँग एकदमै तेजिलो दिमाग र स्पष्ट रणनीति छ । उनले आफूलाई कहाँ राख्ने भनेर छिट्टै थाहा पाउँछन् ।
आफू वरिपरि विपक्षी खेलाडीले घेरेको उनलाई मनपर्छ । जब मेसी मुस्काउँछन्, सिंगो टीम मुस्काउँछ ।’ यो जितसँगै पिएसजीले ३ अंक जोडेको छ । क्लेरमन्टले अंक जोड्न सकेको छैन । हिजोको खेलमा ग्रोइन इन्ज्युरीका कारण फ्रान्सेली युवा स्टार केलियन एमबाप्पे भने टोलीमा थिएनन् ।
