१६ भदौ ,एजेन्सी ।
भारतमा ६ दशकदेखि हुदै आएको गोर्खा सैन्य भर्ती अन्योलमा परेका बेला भारतमा रहेका गोर्खा सैनिकहरु चीन तथा रुससँगको संयुक्त सैन्य अभ्यासमा सहभागि हुने भएका छन् । भारतले पछिल्लो समय सेना भर्नामा ल्याएको अग्निपथ योजनाको अग्नि वीरमा असहमति जनाउदै नेपालले यहाँ संचालनमा ल्याएको गोर्खा भर्तीकेन्द्र बन्द गर्न आग्रह गरेपछि अन्योलता बढिरहेका बेला भारतले चीन र रुससँगको त्रिदेशीय युद्ध अभ्यासमा गोर्खा सैनिकलाई पनि उतार्ने योजना बनाएको खुलेको छ ।
ताइवान प्रकरण तथा युक्रेन युद्धलाई जोडेर अमेरिकालाई सन्देश दिने गरी रूस र चीनको अगुवाईमा हुने अभ्यासमा गोर्खा सैनिक पनि सहभागी हुने भएका हुन् । युक्रेनमा आफ्नो आक्रमणलाई लिएर अमेरिका र यसका सहयोगीहरूले आफूलाई एक्लो पार्न गरेको प्रयासविरूद्ध रूसले चीन र भारतसँग बिहीबारदेखि ठूलो सैन्य अभ्यास गर्न लागेको अन्तर्राष्ट्रिय सञ्चारमाध्यमले जनाएका छन् ।
उक्त सैन्य अभ्यासमा भारतीय सेनामा कार्यरत गोर्खा सैनिक सहभागी हुने अन्तर्राष्ट्रिय समाचार संस्था ब्लुमबर्गले जनाएको छ । अमेरिकाले भारतलाई रक्षा साझेदार बनाउन खोजेको छ र युक्रेनको युद्धमा रूसमाथि लगाइएका अन्तर्राष्ट्रिय प्रतिबन्धहरूलाई कमजोर नगर्न आग्रह गर्दै आएको छ । यस्तोमा नयाँ दिल्लीले अभ्यासका लागि गोर्खा सैनिकसहित ७५ सदस्यीय टोली पठाएको ब्लुमबर्गले टिप्पणी गरेको छ । जसमा भारतीय नौसेना र वायु सेनाका अधिकारीहरुको पनि सहभागिता रहनेछ ।
रूसमा सञ्चालन हुने साताव्यापी ‘भोस्तोक–२०२२’ युद्ध खेलमा १४० भन्दा बढी विमान र ६० वटा युद्धपोतसहित ५० हजारभन्दा बढी सेना सहभागी हुनेछन् । उक्त अभ्यासमा नौसैनिक अभ्यास ‘सी अफ जापान’मा आयोजना गरिनुका साथै पाँच हजार थान सैन्य उपकरण प्रयोग हुने रूसी सेनाले जनाएको छ ।
नियमित अभ्यास भनिएको उक्त कार्यक्रममा संघाई कोअपरेसन अर्गनाइजेसन र पूर्वसोभियत गणराज्यहरुको संगठन कलेक्टिभ सेक्युरिटी ट्रिटी अर्गनाइजेसनले संगठनका सदस्य राष्ट्रहरू र साझेदारहरूलाई एकसाथ ल्याउन लागेको हो । यसअघि, अभ्यासमा सहभागी भइसकेको भारतले रूस–युक्रेन युद्धमा रूसको पक्ष लिनबाट जोगिँदै आएको छ । त्यसो त रूस भारतको मुख्य हतियार आपूर्तिकर्ता पनि हो ।
यता, बेइजिङस्थित रक्षा मन्त्रालयले सैन्य समन्वयलाई सुदृढ पार्ने उद्देश्यका साथ अभ्यासमा चीनको सेना, वायु र जलसेनाले भाग लिएको जनाएको छ । चिनियाँ कम्युनिष्ट पार्टी समर्थित ग्लोबल टाइम्सले यस वर्षको अभ्यास विशेष गरी प्रशान्त क्षेत्रमा अमेरिकाबाट हुने सम्भावित खतराहरूमा केन्द्रित हुने बताइएको छ । यसअघि जापानको विरोधका कारण भारतले यो अभ्यासमा सहभागि हुन अस्वीकार गरेको खबर बाहिरिएको थियो ।
युक्रेनपछि चर्किएको ताइवान विवादपछि विश्वका शक्ति राष्ट्रहरु एकले अर्का पक्षलाई सैन्य शक्ति देखाउन शक्ति पर्दशन गर्दै आएका छन् । ताइवान विवादपछि चीनले लगातार एक हप्ता लाइभ युद्ध अभ्यास गरेर शक्ति प्रर्दशन गरेको छ भने ताइवान दक्षिण कोरिया भारत तथा रुसले पनि एक पक्षीय तथा संयुक्त सैन्य अभ्यास हरु गर्दै आएका छन् ।
