१४ असोज,एजेन्सी ।
अन्तर्राष्ट्रिय क्रिकेट परिषद् (आईसीसी) ले टी–२० विश्वकप क्रिकेट २०२२ को पुरस्कार रकम घोषणा गरेको छ । आईसीसीले शुक्रबार विश्वकपको पुरस्कार रकम घोषणा गरेको हो । आईसीसीले घोषणा गरे अनुसार २०२२ को विश्वकको विजेता राष्ट्रले १ दशमलव ६ मिलियन अमेरिकी डलर अर्थात (नेपाली २० करोड ८८ लाख ५६ हजार रुपैयाँ) पुरस्कार पाउने भएका छन्।
उपविजेताले ८,००,००० अमेरिकी डलर (नेपाली १० करोड ४४ लाख २२ हजार ४ सय रुपैयाँ) प्राप्त गर्दा सेमिफाइनल पुग्ने टोलीले ४,००,००० अमेरिकी डलर (नेपाली ५ करोड २१ लाख ९२ हजार ३ सय ५२ रुपैंया) पुरस्कार प्राप्त गर्नेछन् ।
यसैगरि पहिलो चरणबाटै बाहिरीने राष्ट्रले नेपाली ५२ लाख १९ हजार २ सय ५३ रुपैयाँ पाउने छन् भने सुपर १२ बाट बाहिरीने टोलीले ९१ लाख ३२ हजार ८ सय २० रुपैयाँ प्राप्त गर्नेछन् ।विश्वकपको कुल पुरस्कार राशी भने ५.६ मिलियन अमेरिकी रहेको आईसीसीले जनाएको छ ।
टी–२० विश्वकप १६ अक्टोबरदेखि १३ नोभेम्बरसम्म अष्ट्रेलियामा आयोजना हुँदैछ । यो पटकको टी–२० विश्वकपमा १६ राष्ट्रको सहभागिता रहनेछ । २०२२ को टी–२० विश्वकपमा एडिलेड ओभल, गाब्बा, जिलङको कार्डिनिया पार्क, होबर्टको बेलेरिभ ओभल, पर्थ स्टेडियम, एमसीजी ( मेलबोर्न क्रिकेट ग्राउण्ड ) र एससीजी ( सिड्नी क्रिकेट ग्राउण्ड ) मा एक महिनाभन्दा कम अवधिमा कुल ४५ खेलहरू हुनेछन्।
सेमिफाइनल नोभेम्बर ९ र १० मा सिड्नी क्रिकेट ग्राउण्डमा र एडिलेड ओभलमा र १३ नोभेम्बर आइतवार एमसीजी ( मेलबोर्न क्रिकेट ग्राउण्ड ) मा फाइनल हुनेछ। टूर्नामेंट, जुन सुरुमा २०२० मा अस्ट्रेलियामा आयोजना हुने थियो तर महामारीको कारण स्थगित गरिएको थियो ।
विश्वकपमा सिधै सुपर १२ चरणमा पुग्ने आठ टोली अफगानिस्तान, अष्ट्रेलिया, बंगलादेश, इंग्ल्याण्ड, भारत, न्युजिल्यान्ड, पाकिस्तान र दक्षिण अफ्रिका छन् । समूह ‘ए’ मा रहेका नामिबिया, श्रीलंका, नेदरल्यान्ड्स, युएई र समूह ‘बी’ मा रहेको वेष्ट इन्डिज, स्कटल्याण्ड, आयरल्याण्ड र जिम्बाब्वेलाई दुई समूहमा विभाजन गरी पहिलो चरणको खेल खेलिनेछ ।
