२८ असोज, काठमाण्डौ ।
नयाँ सरकार गठन गर्नेगरी प्रदेश सभाको निर्वाचन मिति नजिकिरहेका बेला मधेस प्रदेशका मुख्यमन्त्री लालबाबु राउतले कांग्रेसका तर्फबाट सरकारमा सहभागी भएका तीन मन्त्रीलाई बर्खास्त गरेका छन् । प्रधानमन्त्री शेरबहादु्र देउवाले संघीय सरकारबाट जसपाबाट बनेका मन्त्रीहरु हटाएको भोलिपल्ट मुख्यमन्त्री राउतले कांग्रेसबाट प्रतिनिधित्व गरेका मन्त्रीहरु हटाएका हुन् ।
मन्त्री पद जानेहरुमा मधेस प्रदेशका भौतिक पूर्वाधार विकासमन्त्री रामसरोज यादव, खानेपानी तथा ऊर्जाविकासमन्त्री ओमप्रकाश शर्मा र महिला बालबालिका, युवा तथा खेलकुदमन्त्री विरेन्द्रप्रसाद सिंह छन् । यसअघि उनीहरुलाई मन्त्री पद छाड्न मुख्यमन्त्रीले चेतावनी दिएका थिए ।
संघीय सरकारका प्रधानमन्त्री शेरबहादुर देउवाले जसपाका चारजना मन्त्रीलाई बर्खास्त गरेपछि जसपा नेतृत्वको मधेस प्रदेश सरकारका मुख्यमन्त्री राउतले कांग्रेसबाट सरकारमा मन्त्री रहेका तीन जनालाई हटाएको नेता मनिष सुमनले बताएका छन् । मुख्यमन्त्री राउतले पनि काँग्रेसबाट सरकारमा रहेका यी तीन जना मन्त्रीसँग राजीनामा माग गरेका थिए ।
तर उनीहरूले राजीनामा दिन अस्वीकार गरेपछि गरेपछि मुख्यमन्त्री राउतले उनीहरूलाई बर्खास्त गरेका हुन् । माओवादी केन्द्र र नेकपा (एकीकृत समाजवादी) लाई भने हालसम्म राजीनामा दिन भनिएको छैन । उनीहरु आफै राजीनामा दिएर गए भने जसपाले नरोक्ने जसपा नेताहरुको भनाइ छ ।
मधेस प्रदेश सरकारमा माओवादी केन्द्रका राज्यमन्त्रीसहित दुई र नेकपा एकीकृत समाजवादीका राज्यमन्त्रीसहित दुई मन्त्री सहभागी छन् । माओवादी केन्द्रबाट आन्तरिक मामिला तथा सञ्चार मन्त्री भरतप्रसाद साह, राज्यमन्त्री रुवी कर्ण र नेकपा एसको तर्फबाट उद्योग पर्यटन तथा वन मन्त्री शत्रुधन महतो र कानुन, न्याय तथा प्रदेशसभा मामिला मन्त्री प्रमोद कुमार यादव छन् ।
बिहीबार संघीय सरकारबाट प्रधानमन्त्री शेरबहादुर देउवाले जसपाबाट मन्त्री बनेका प्रदीप यादव, मृगेन्द्रसिंह यादव, इस्तियाक राई र राजेन्द्र श्रेष्ठलाई हटाएका थिए । जसपाको गठबन्धन परिवर्तन पछि संघीय सरकारबाट सुरु भएको यो कम्पन मधेस प्रदेशमा प्रवेश गरेको छ ।
प्रदेश १ मा पनि नेकपा एकीकृत समाजवादीको नेतृत्वको गठबन्धन सरकारमा जसपाका जयराम यादव सामाजिक विकास मन्त्री रहेका छन् । यस्तै गण्डकी प्रदेश सरकारमा पनि जसपाको सहभागिता रहेको छ ।
