८ मंसिर,काठमाण्डौ ।
राजनीति सेवा भाव हो, निरन्तरता हो, जनताको नजिकको असल साथी र बोली हो । वास्तविक राजनीतिक नेतृत्वमा त्याग, लगन,योगदान र भिजन हुनु अत्यावश्यक छ। यसको एक पछिल्लो उदाहरण बनेका छन् राप्रपाका नेता दीपकबहादुर सिंह । मकवानपुर क्षेत्र नम्बर–१ मा राप्रपाका सिंह विजयी भएका छन् ।
उनी नेपाली कांग्रेस सहमहामन्त्री महालक्ष्मी उपाध्याय ’डीना’ र राप्रपा नेपाका अध्यक्ष कमल थापालाई पराजित गर्दै विजयी भएका हुन् । सिंहले २ हजार ३९३ मतको फरकमा विजयी भएका हुन् । कुल ९१ हजार ५८३ म खसेकोमा विजयी सिंहले २७ हजार ८१६ हजार मत प्राप्त गरेका थिए ।
उनका निकटतम प्रतिद्वन्द्वी सत्तारुढ गठबन्धनकी उम्मेदवार डीनाले २५ हजार ४२३ मत प्राप्त गरिन् । एमालेको चुनाव चिन्हबाट उम्मेदवार बनेका थापाले २५ हजार ४२० मत प्राप्त गरे । २०५१ सालको निर्वाचनमा राप्रपाका तत्कालिन उम्मेदवार कमल थापाले एमालेका कृष्ण दाहाललाई पराजित गर्दै विजयी भएका थिए ।
त्यसयता हेटौंडामा २८ वर्षपछि राप्रपाले जित हात पारेको हो । यो जित सिंहले दिलाएका हुन् । गत स्थानीय तह निर्वाचनमा पनि सत्तागठबन्धन र एमालेलाई हेटौडामा धक्का दिएर सनसनी मच्चाएका थिए दीपकबहादुर सिंहले ।
त्यतिबेला तेस्रो स्थानमा रहे पनि हेटौँडा उपमहानगरपालिकाको मेयरमा सुरुदेखि नै सिंहले प्राप्त गरेको प्रतिस्पर्धात्मक मतका कारण सनसनी नै मच्चिएको थियो । अहिले पनि प्रतिनिधि सभाको मतगणनाको अन्तिम समयमा झन् ठूलो सनसनी सिर्जना गरेर जित निकालेका छन् ।
मतगणनाको सुरुवाती अवस्थामा पछि परेका उनले नेपाली कांग्रेसकी नेतृ महालक्ष्मी उपाध्याय डिनालाई अन्तिम समयमा अग्रता लिएर नतिजा आफ्नो पक्षमा पार्न सफल भएका हुन् । स्थानीय तहको निर्वाचनमै रवाफिलो जुँगा र जिउडालका सिंहले प्राप्त गरेको त्यो आश्चर्यजनक मतपछि उनी यहाँ ‘हेटौँडाको नयाँ शेर’ का रुपमा चिनिन थालेका थिए ।
एमालेको किल्ला मानिएको हेटौँडामा उनले प्राप्त गरेको मतले उनलाई ‘शेर’ को परिचय दिलाएको थियो । तिनै सिंह यसपटक मकवानपुर–१ मा प्रतिनिधि सभाको उम्मेदवार रहेर जित्न पनि सफल भएका हुन् ।
