Nepal Times
Nepal Times
369
Shares

चुनावमा हारे पनि लाज नमान्ने थेत्तरा मन्त्रीहरु सरकारी खर्चमा विश्वकप हेर्न जाने

चुनावमा हारे पनि लाज नमान्ने थेत्तरा मन्त्रीहरु सरकारी खर्चमा विश्वकप हेर्न जाने

१२ मंसिर, काठमाण्डौ ।
एक वर्षअघिको मंसिर महिनामा सम्पन्न भएको नेपाली काँग्रेसको महाधिवेशनमा महामन्त्रीमा पराजित भएपछि तत्कालीन रक्षामन्त्री डा. मिनेन्द्र रिजालले नैतिकताका लागि भन्दै पदबाट राजीनामा दिए । रिजाल पछिल्ला उदाहरण हुन, उनीभन्दा अघि नेपालमा नैतिकताका आधारमा राजीनामा दिने अरु पनि धेरै छन् ।

मिनेन्द्र रिजालले पार्टीको महाधिवेशनमा हार्दासमेत नैतिकता देखाएका थिए । तर अहिले संसदीय चुनावमा हार्दा पनि केही मन्त्रीहरुले भने नैतिकता देखाएर राजीनामा दिने त परै जाओस बरु उल्टै आफ्नो पदको अनैतिक लाभ उठाइरहेका छन् । अहिले सरकारमा रहेका ६ मन्त्री प्रतिनिधिसभामा पराजित भएका छन् ।

गृहमन्त्री बालकृष्ण खाँण,ऊर्जामन्त्री पम्फा भुसाल, पर्यटनमन्त्री जीवनराम श्रेष्ठ, खानेपानीमन्त्री उमाकान्त चौधरी, खेलकुदमन्त्री महेश्वरजंग गहतराज र मन्त्रिपरिषद् कार्यालयका राज्यमन्त्री उमेश श्रेष्ठ यो निर्वाचनमा पराजित भएका छन । तर आफ्नै निर्वाचन क्षेत्रमा अस्वीकृत भएपछि राजीनामा दिनु आधारभूत नैतिकताको विषय भए पनि उनीहरूले बेवास्ता गरेका छन ।

उनीहरू जनताद्वारा अस्वीकृत भएका हुन् । जनताले नै अस्वीकार गरिसकेपछि पनि राजीनामा नदिनु चरम पदलोलुपता हो । तर न त प्रधानमन्त्री र न त सम्बन्धित दलले पनि मतदाताको सन्देशलाई कदर गर्न आवश्यक नै ठानेका देखन्छिन् ।

चुनाव हारेपनि गृहमन्त्री खाँण प्रधानमन्त्रीपछि दोस्रो वरीयतामा कायमै छन् । राजनीतिक शक्तिलाई परिवारमा केन्द्रित गरेको भनेर कार्यकर्ताको चर्को असन्तुष्टिबीच गृहमन्त्री खाँण पराजित भएका हुन । उनकी श्रीमती मञ्जु खाँण कांग्रेसको समानुपातिक सूचीमा खसआर्यतर्फ छैटौं नम्बरमा छिन । उनी सांसद बन्ने पक्कापक्की छ ।

गृहमन्त्रीका भाइ रामकृष्ण रूपन्देहीको तिलोत्तमा नगरपालिकाका मेयर छन । यता काठमाडौं ८ बाट प्रतिनिधि सभा सदस्यमा पराजित भएका पर्यटनमन्त्री जीवनराम श्रेष्ठ राजीनामा दिनु त कता हो कता उल्टै नेपाल वायुसेवा निगमकै खर्चमा विश्वकप हेर्न दोहा जाने भएका छन् ।

चुनावमा हार व्यहोरेकाले नैतिकताका आधारमा पद छाड्न दबाब भइरहेका बेला मन्त्री विश्वकप हेर्न विदेश जान लागेका हुन् । निगमको भत्ता सुविधासँगै विजनेश क्लासमार्फत दोहा जान लागेको हुन् । संस्कृति पर्यटन तथा नागरिक उड्डयन मन्त्रालयले नेपाल वायुसेवा निगमको अनुगमनमा जान भन्दै मन्त्री श्रेष्ठलाई दोहाको टिकट उपलब्ध गराउन पत्राचार गरिएको छ ।

यो भ्रमणमा उनले प्रयोग गरेको हवाई यातायात, खानपिन, बसाईँ लगायतको खर्च निगमको हुनेछ । यो उडानको दुईतर्फी भाडादर एक लाख ५० हजार रुपैयाँ रहेको बताइएको छ । यस्तै चुनावमा हार ब्योहोरेका अन्य मन्त्रीहरुले पनि नैतिकता के हो भन्ने नै विर्सिएका छन् । त्यसमाथि पूर्णतः कामचलाउ भइसकेको सरकारले नीतिगत निर्णय गर्न पनि मिल्दैन ।

यसैले मन्त्रीहरूविना कामकाज पनि रोकिँदैन । कर्मचारीले समेत यस्ता मन्त्रीहरुको आदेश पालन गर्न आलटाल गर्छन् । तर मन्त्रीहरु सबै लाज पचाएर कुर्सीमै टाँसिरहेका छन् । यद्यपी हार्नासाथ मन्त्रीहरुले राजीनामा दिनुपर्छ भनेर कुनै कानुनमा स्पष्ट लेखिएको छैन ।

तर नैतिक नियम भन्ने कुरा पदमा बसेकाहरुले पालना गर्नै पर्छ । साथै नेपालको संविधान कार्यान्वयनको प्राथमिक चरण भएकाले अहिले नैतिक मूल्यको सम्मान गर्ने परम्परा स्थापित भयो भने त्यसलाई उल्लङ्घन गर्ने आँट पछिकाले पनि गर्नेछैनन् । त्यसका लागि पनि चुनावमा हारेका मन्त्रीहरुले नैतिकता देखाउँन आवस्यक छ ।

तपाईंको प्रतिक्रिया

© copyright 2023 and all right reserved to Nepal Times | Design By : InDesign Media Pvt. Ltd.