१५ मंसिर,काठमाण्डौ ।
प्रतिनिधि सभाको निर्वाचनको अन्तिम मत परिणाम आउँदै गर्दा शीर्ष दलका नेताहरु सरकार गठनको तयारीमा जुटेका छन् । गठबन्धन गरेर चुनावमा होमिएको सत्तारुढ गठबन्धनले अहिले सम्मको परिणामलाई आधार मानेर सरकार बनाउने तयारी रुवरुप आन्तरिक छलफललाई घनिभूत पारिरहेका बेला सत्तारुढ गढबन्धन भित्रबाट प्रधानमन्त्रीका लागि रस्साकस्सी सुरु भएको छ ।
निर्वाचन पूर्व अवस्थामा नै गठबन्धनको सरकार बन्दा प्रधानमन्त्रीमा शेरबहादुर देउवा नै दोहोरिने बताएको संस्थापन पक्षले अबको सरकारको नेतृत्व पनि देउवाले नै गर्ने बताइरहदा नेपाली काग्रेस भित्र प्रधानमन्त्रीका लागि थुप्रै आकाक्षी देखिएका छन् । गगन थापाले प्रधानमन्त्रीका लागि आक्रमक रुपमा आफूलाई अघि बढाईरहेको बेला नेपाली कांग्रेस नेता डाक्टर शेखर कोइरालाले संसदीय दलको नेता को बन्छ भन्ने विषयमा भने उनी खुलेर बोलेका छैनन् ।
विराटनगरमा बिहीबार बिहान पत्रकार सम्मेलन गर्दै उनले संसदीय दलका सभापति शेरबहादुर देउवा टिमको बर्चस्व भएपनि संसदीय निर्वाचनमा आफ्नो टिमले प्रयास भने गर्ने बताएका छन् । ‘नम्बर गेममा यसै हेर्दा शेरबहादुरजीकै बर्चस्व छ भन्ने देखिन्छ,’ उनले भने, ‘हामी कसरी जाने म शेरबहादुरजीसँग पनि कुरा गर्छु, पार्टीको सभापतिसँग कुरा नगरी जिम्मेवार व्यक्तिले अगाडि बढ्न पनि हुँदैन जस्तो लाग्छ, अन्य साथीहरुसँग पनि कुरा गर्छाैं ।’
शेखर कोइरालाको टिमबाट महामन्त्री जितेका गगन थापाले संसदीय दलको नेताका लागि उम्मेदवारी घोषणा गरिसकेका छन् । उनी आक्रामक रुपमा अगाडि बढिरहेका छन् । तर कोइरालाले भने खुलेर बोलेका छैनन् । ‘पार्लामेन्ट्री पार्टीको लिडरसीपको लागि मुख्य नम्बर (सदस्य संख्या) गेम नै हो,’ उनले भने, ‘अब हामीले कोशिस गर्ने हो त्यो नम्बर पु¥याउनलाई । नम्बर गेम लिनलाई हामीले प्रयास गर्ने, त्यो बेग्लै कुरा भो तर नम्बर पुगेन भने शिथिल भएर बस्ने त होइन, हाम्रा एजेण्डाहरु छँदैछन् त्यसलाई अगाडि बढाउने हो ।’
उनले संसदीय दलको नेतामा दावी गरिरहेका नेता गगन थापासँग आफ्नो फोनमा मात्रै कुरा भएको बताएका छन् । कोइरालाले सरकार भने कांग्रेसकै नेतृत्वमा सरकार बन्ने बताए । सरकारको नेतृत्व गर्न माओवादी केन्द्रका अध्यक्ष पुष्पकमल दाहाल प्रचण्डले दौडधूप बढाइरहेका बेला कोइरालाले निर्वाचनबाट सन्तोषजनक नतिजा आएको बताउँदै कांग्रेसको नेतृत्वमा सरकार बन्ने दावी गरेका हुन् ।
उता नेपाली कांग्रेसका वरिष्ठ नेता रामचन्द्र पौडेलले प्रधानमन्त्रीमा आफ्नो दाबेदारी स्वाभाविक रहेको बताएका छन् । नेपाल प्रेस युनियन चितवनले बिहीबार चितवनमा आयोजना गरेको पत्रकार सम्मेलनमा वरिष्ठ नेता पौडेलले कांग्रेसको नेतृत्वमा गठबन्धनको सरकार र त्यसको नेतृत्व आफूले पाउनुपर्ने स्वाभाविक माग भएको बताएका हुन् ।
‘गठबन्धनको बहुमत पुग्छ । गठबन्धनको सरकार बन्छ । दलहरुबीच सल्लाह हुँदैछ,’ उनले भने, ‘म प्रधानमन्त्रीको स्वाभाविक उम्मेदवार हो । अहिले प्रधानमन्त्रीको उम्मेदवार मै हो ।’ पार्टीभित्र सल्लाह गरेर एउटा मात्र उम्मेदवार बनाइने उनले बताए ।
पार्टीभित्र आन्तरिक सल्लाह हुन बाँकी रहेको पौडेलको भनाइ छ ।‘सबै साथी खुला नै हुनुहुन्छ, सभापति र अरु साथीहरु पनि खुला हुनुहुन्छ । तर अहिलेको परिस्थिति देशले एक पटक नयाँ टेष्ट गर्नुपर्ने मान्छे म मात्र हो,’ उनले भने, ‘पार्टी सभापतिले मेरो प्रस्तावलाई सहजरुपमा नै लिनुभएको छ । सल्लाह गरौला भन्नुभएको छ । सल्लाह हुन्छ ।’
