१७ पौष, एजेन्सी ।
अमेरिकी अर्बपति एलोन मस्क पछिल्लो समय हरेक दिन ओरालो लागिरहेका छन् । अहिलेसम्मकै सबैभन्दा बढी घाटा खाने ब्यक्तिका रुपमा आफ्नो नाम लखाएका मस्कविरुद्ध ट्वीटर कम्पनीले घरभाडा नतिरेको भन्दै मुद्दा दायर भएको छ।
अमेरिकाको सन्फ्रान्सिस्कोस्थित एक अदालतमा ट्वीटर कम्पनीविरुद्ध मुद्दा दायर भएको हो। ट्विटरले १ लाख ३६ हजार २५० डलर भाडा तिर्न बाँकी छ। यसअघि विश्वभरका ट्विटर कार्यालयले पनि भाडा तिर्न नसकेको समाचार आएको थियो।ट्विटर कार्यालय भएका भवनका घरधनी कोलम्बिया रेइटले सन्फ्रान्सिस्कोस्थित अदालतमा मुद्दा दायर गर्दै भाडा नतिरेपछि डिसेम्बर १६ मा पाँच दिनभित्र भवन खाली गर्न गरेको आग्रह पनि ट्विटरले अस्वीकार गरेको उल्लेख गरेका छन्।
कम्पनीमाथि चार्टर्ड उडानको पनि पैसा नतिरेको विषयमा मुद्दा दायर भएको छ। सन्फ्रान्सिस्कोको वित्तीय क्षेत्रको क्यालिफोर्निया स्ट्रिटमा रहेको हार्टफोर्ड बिल्डिङको ३० औं तलामा ट्वीटरको कार्यालय छ। यद्यपि यो कार्यालय ट्विटरको मुख्यालय भने होइन। यस विषयमा ट्वीटरले भने कुनै पनि आधिकारिक वक्तव्य भने जारी गरेको छैन।
ट्विटरमा हालैका परिवर्तनहरूको सूचीमा अर्को परिवर्तन थपिएको छ। यो परिवर्तन बुकमार्क सुविधासँग सम्बन्धित छ। माइक्रोब्लगिङ साइटका सीईओ एलोन मस्कले ट्वीट गर्दै प्लेटफर्मको ’बुकमार्क्स’ सुविधाको प्रयोगकर्ता इन्टरफेसमा परिवर्तन भएको घोषणा गरेका छन्।
टेस्ला तथा ट्विटरका मालिक एलोन मस्क २०० अर्ब डलर गुमाउने संसारका पहिलो व्यक्ति बनेका छन् । ब्लूमबर्ग बिलिनेयर इन्डेक्सका अनुसार, सन् २०२१ मा मस्कको व्यक्तिगत सम्पत्ति २०० अर्ब डलरभन्दा बढी थियो । त्यतिखेर उनले अमेजनका मालिक जेफ बेजोसलाई पनि पछारेका थिए ।
पछि उनको नेटवर्थ ३०० अर्ब डलर पुगेको थियो । टेस्लाका शेयरहरू घटेपछि मस्कको कुल सम्पत्ति १३७ अर्ब डलरमा आइपुगेको छ । डिसेम्बर २७ मा टेस्लाका शेयरहरूमा ११ प्रतिशतसम्मको गिरावट आएको थियो ।
