१५ फागुन, काठमाण्डौ ।
नेकपा एमाले पुष्पकमल दाहाल प्रचण्ड नेतृत्वमाथिको सरकारबाट बाहिरिएको छ । एमालेले सरकारलाई दिएको समर्थन फिर्ता लिएको छ । सचिवालयको आकस्मिक बैठकपछि सरकारबाट बाहिरिने निर्णयसँगै समर्थन पनि फिर्ता लिएको उपाध्यक्ष विष्णु पौडेलले जानकारी दिए ।
उपप्रधान तथा अर्थमन्त्रीसमेत रहेका पौडेलले पुस १० मा एमालेलाई राष्ट्रपति दिने गरी भएको सहमति पालनामा प्रधानमन्त्री प्रचण्ड गम्भीर भएर नलागेको भन्दै बैठकले सरकारमाथिको समर्थन फिर्ता लिने निर्णय गरेको बताए । यसअघि ८ दलीय नयाँ समीकरण बनेपछि एमालेले राष्ट्रपतिको फागुन २५ गते हुने राष्ट्रपति निर्वाचनसम्म सरकारमा रहीरहने निर्णय गरेको थियो ।
तर पछिल्लो समय ८ दलीय गठबन्धनले राष्ट्रपति निर्वाचनका लागि कार्यदल बनाउँदै गठबन्धनका रुपमा अघि बढ्ने निर्णय गरेपछि एमाले सरकारबाट बाहिरिएको हो । हिजोमात्रै जेनेभा उड्ने तयारीमा रहेकी परराष्ट्र मन्त्री विमला पौड्यालको भ्रमण अन्तिम समयमा प्रधानमन्त्री प्रचण्डले रोकेपछि एमाले नेताहरु रुष्ट भएका थिए ।
प्रधानमन्त्रीको यो कदमलाई एमाले नेताहरुले अपमानको रुपमा ब्याख्या गरेका छन् । सोही कारण पनि एमालेले फागुन २५ सम्म नकुरी आर्ज सरकारबाट बाहिरिने निर्णय गरेको नेताहरुले बताएका छन् । पुस १० गते नाटकीय रुपमा सहमति गरी आफ्नै पहलमा प्रचण्डलाई प्रधानमन्त्री बनाएको एमालेले प्रचण्डले नयाँ गठबन्धन बनाएपछि अहिले आफै सरकार छाड्नु परेको छ ।
यसअघि नै सरकारमा रहेको रास्वपाले सरकार छाडेको थियो भने नयाँ गठबन्धन बनेपछि राप्रपाले शनिवार सरकार छाड्ने निर्णय गरेको थियो ।अब सात दलीय गठबन्धनमा रहेको जनमत पार्टी र माओवादी मात्रै सरकारमा छन् । एमालेले अब आफै सरकार छाडेपछि प्रचण्डलाई ८ दलीय गठबन्धनबाट सरकार विस्तार गर्न बाटो खुलेको छ ।
सात दलीय गठबन्धन टुटेर आठ दलीय मोर्चा बनेपछि केन्द्रदेखि प्रदेशसम्म एमालेको सरकार संकटमा परेको छ। आठ मन्त्रीसहित सरकारमा सहभागी एमाले केन्द्रमा प्रतिपक्षमा रहने सम्भावना बढेको छ भने यससँगै प्रदेश १, गण्डकी र लुम्बिनी सरकार पनि संकटमा परेको छ। सुदूरपश्चिम सरकार यसअघि नै ढलिसकेको छ।
