१५ फागुन, एजेन्सी ।
युक्रेनमा आक्रमण थालेयता रुस पश्चिमाहरुको चौतर्फी प्रतिबन्धमा पर्यो । कयौं विदेशी विश्वव्यापी ब्राण्ड, बैंक तथा लगानीकर्ताहरु रुसी बजारबाट बाहिरिए भने रुसबाट निर्यात हुने बस्तुहरुमा प्रतिबन्ध लगाइए । रुसी राजनीतिज्ञ तथा ब्यापारीहरुसमेत प्रतिबन्धनमा परे ।
चौतर्फी प्रतिबन्धमा परेपछि रुसी अर्थतन्त्रमा निकै संकुचन आउने ठानिएको थियो । तर यो अनुमान सहि सावित हुन सकेन । योबीचमा पश्चिमाहरुले रुसी उत्पादनलाई अस्वीकार गर्दा यता भारत, चीन न केबल रुसका लागि ठूला बजार बन्न पुगे, रुसी बजारमा पनि यी मुलुकहरुको दबदबा कायम हुन थालेको छ । यो रेशमा चीन अगाडि देखियो ।
पश्चिमाहरुले प्रतिबन्ध लगाइरहँदा यसले रुसीहरूलाई स्मार्टफोनदेखि कारसम्म सबै कुराको विकल्प खोज्न बाध्य पार्यो । जसको फाइदा चीनले उठायो । हाल रुसमा पश्चिमा देशहरुको भन्दा चिनियाँ उत्पादनहरुको बिक्री बढेको छ । चिनियाँ स्मार्टफोनको विशाल कम्पनी शाओमी र अटोमेकर जिलीले हालैका महिनाहरूमा रुसमा बिक्री बढेको बताएका छन् ।
काउन्टरपोइन्ट रिसर्चका अनुसार आईफोन र सामसङका ग्यालेक्सी सिरिज रुपमा कुनै समय बेस्टसेलर थिए । शाओमी र अर्को चिनियाँ बिक्रेता रियलमीका मोडेलहरूअब बिक्री चार्टको शीर्ष स्थानमा रहेका छन् । सन् २०२१ को डिसेम्बरमा स्मार्टफोन बजारको झण्डै ४० प्रतिशत हिस्सा ओगटेका चिनियाँ उत्पादकहरू युद्धअघि नै रुसमा लोकप्रिय रहेको काउन्टरपोइन्ट डाटाले देखाएको छ ।
एक वर्षपछि उनीहरूले लगभग पूरै बजारको ९५ प्रतिशत हिस्सा ओगटेका छन् । रुसमा सामसङ र एप्पल ब्राण्डहरुको संयुक्त बजार हिस्सा ५३ प्रतिशतबाट ३ प्रतिशतमा झरेको छ । एस एण्ड पी ग्लोबल मोबिलिटीको तथ्यांक अनुसार गत वर्ष चिनियाँ कार निर्माताहरू चेरी र ग्रेटवाल मोटर शीर्ष १० प्यासेन्जर सवारी अन्तर्गत परेका छन् ।
यसबाट जर्मनीको बीएमडब्ल्यु र मर्सिडीज ब्रान्ड भने गायब भएका छन् । डेटा प्रदायक अटोस्ट्याटका अनुसार रुसीहरूले गत वर्ष उच्च संख्यामा चिनियाँ कारहरू किनेका थिए । चीनको नयाँ कारको बिक्री सन् २०२२ मा ७ प्रतिशतले बढेर १ लाख २१ हजार ८०० सवारी साधनमा पुगेको छ ।
रुसको स्वदेशी ब्रान्ड लाडा पहिले नै युद्ध अघि रूसको सबैभन्दा लोकप्रिय कार निर्माता थियो । हुन्डाई र किया रुसबाट बाहिर निस्किनुले रुसको बजारमा ठूलो खाडल निर्माण भएको थियो जसलाई पूर्ति गर्न चिनियाँ ब्राण्डहरु सफल भएका छन् । चिनियाँ कम्पनी शाओमी, रियलमी र अनर जस्ता बजेट ब्रान्डले यो समयमा अवसर लिएको काउन्टरपोइन्ट रिसर्चका सहायक निर्देशक जान स्ट्राइजकले बताए ।
तिनीहरूले अघिल्लो त्रैमासिकको तुलनामा २०२२ को तेस्रो त्रैमासिकमा क्रमशः ३९ प्रतिशत, १९० प्रतिशत र २४ प्रतिशतले रूसमा ढुवानी बढाएका छन् । शाओमी प्रमुख नाफा कमाउने कम्पनी बनेको छ । यसले वर्षभरिमा रुसमा आफ्नो बजार हिस्सा दोब्बर बनाएको छ ।
बेइजिङस्थित कम्पनी अब रुसको स्मार्टफोनको शीर्ष बिक्रेता हो । यसको लोकप्रिय रेडमी लाइनमा भएको हाई क्यामेरा गुणस्तरका लागि परिचित फोन बन्न पुगेको छ ।
