Nepal Times
Nepal Times
3
Shares

नेपाल वायुसेवा निगमको जहाजमा फेरि समस्या, दुबईमा ग्राउण्डेड/ उडान अस्तव्यस्त

नेपाल वायुसेवा निगमको जहाजमा फेरि समस्या, दुबईमा ग्राउण्डेड/ उडान अस्तव्यस्त

१७ फागुन, एजेन्सी ।
नेपाल वायुसेवा निगमको एउटा जहाज दुबईमा ग्राउण्डेड भएको छ । पटकपटक व्यवस्थापनमा चुक्दा उडान तालिका नै प्रभावित हुने गरेको निगमको जहाज ग्राउण्डेड भएपछि यसले अन्तर्राष्ट्रिय उडान नै अस्तव्यस्त बनाएको छ । निगमको एयरबस–३२० प्राविधिक समस्या आएपछि आइतबारदेखि दुबईमा ग्राउण्डेड छ ।

यो जहाज ग्राउण्डेड भएपछि अन्तर्राष्ट्रिय उडान अस्तव्यस्त बनेको हो । निगमसँग जहाज हुँदा पनि सही व्यवस्थापन नहुँदा तोकिएको समयमा उडान नहुने र अन्तिम समयमा उडान रद्द गर्ने पूरानो रोग हटेको छैन । ‘दुबईमा जहाजको प्राविधिक समस्या इन्जिनियरले हेर्न सुरु गरिसकेका छन् ।

भएको के हो भन्ने अझै पत्ता लागेको छैन,’ निगमका एक कर्मचारीले भने,’त्यो जहाज मर्मत भएर नआउँदासम्म निगमको तालिकामा केही हेरफेर हुनसक्छ।’ निगमसँग भएका चारमध्ये एउटा जहाज ग्राउण्डेड हुँदा अन्तर्राष्ट्रिय गन्तव्यका लागि पूर्वनिर्धारित तालिका प्रभावित भएको उनले बताएका छन् ।

उनका अनुसार टिकट काटिसकेका यात्रुका लागि निगमले फ्लाइ दुबई लगायत अरु वायुसेवा कम्पनीसँग सहयोग लिँदै आएको छ । उडान समय ढिलाइ भएपनि हालसम्म कुनै पनि गन्तव्यतर्फको उडान रद्द भने नभएको उनले कताएका छन् । काठमाडौं आउने क्रममा जहाजमा प्राविधिक समस्या देखिएको भन्दै निगमको नाइन एन–एकेएक्स कलसाइनको जहाज आइतबारदेखि दुबईमै ग्राउण्डेड गराइएको हो ।

‘जहाजमा सानातिना प्राविधिक समस्या आएर केही समयमै हल गरेर पुनः उडान गर्नु स्वभाविक हो । यस अगाडिको घटनालाई हेर्ने हो भने यही सिरिजको जहाजमा समस्या आउँदा महिनौंसम्म विदेशमै ग्राउन्डेड भएको घटना पनि छ,’ एक हवाई विज्ञले भने । यतिखेर निगमको दुबईमा रोकिएको जहाज निगमकै इन्जिनियरिङ टोलीले चेकजाँच गरिरहेको छ ।

‘हालसम्म आएको जानकारी अनुसार इन्जिनको एउटा उपकरण तातेका कारण उडान नभएको हो,’ निगमका एक कर्मचारीले भने,’यो समस्या उतै समाधान हुन पनि सक्छ । यदि भएन भने सामान खरिद प्रक्रिया अघि बढाइनेछ।’ एक वर्षअघि इन्जिनमा समस्या आएपछि नाइन एन–एकेडब्लु कलसाइनको न्यारोबडी जहाज दोहामा ग्राउन्डेड भएको थियो ।

इन्जिन मर्मतका लागि निगमले ठेक्का दिने टुंगो गरिसकेको थियो । अगाडि नै आएको गडबडी हटाउन डेढ महिना लागेको थियो । निगमसँग हाल दुईवटा एयरबस–३३०, दुईवटा एयरबस–३२० गरी चारवटा जहाज छन् । यी जहाजले दिल्ली, मुम्बई, बैंगलोर, जापान, थाइल्याण्ड, हङकङ, साउदी अरेबिया, दुबई, कतार, मलेसियालगायतका अन्तर्राष्ट्रिय गन्तव्यमा उडान गर्दै आएका छन् ।

तपाईंको प्रतिक्रिया

© copyright 2024 and all right reserved to Nepal Times | Design & Develop By : InDesign Media Pvt. Ltd.