१८ चैत,काठमाण्डौ ।
देशको एक मात्र राष्ट्रिय ध्वजाबाहक विमान सेवा नेपाल वायुसेवा निगम (नेपाल एयरलाइन्स)को आरए २१८ कलसाइनको २४ घन्टादेखि दिल्लीमा ग्राउन्डेड भएको जहाज काठमाडौं आइपुगेको छ । पांग्रा पन्चर भएर बिहीबार दिउँसोदेखि दिल्लीमा ग्राउडेड भएको जहाज २६ घन्टापछि शुक्रबार बेलुका काठमाडौं आइपुगेको हो ।
दिल्लीस्थित कतार एयरवेजले आफ्ना विमानका लागि राखेका जगेडामध्येबाट निगमलाई एक दिनका लागि दुइटा पांग्रा सापटीमा दिएपछि निगमको नाईन एन–अल्फा लिमा जुलु रजिष्ट्रेशन नम्बर भएको वाइडबडी काठमाडौं फर्किएको निगमका सहप्रवक्ता गणेश घिमिरेले बताएका छन् ।
वाइडबडीको बायाँतर्फको मेन ल्यान्डिङ गियरका चारवटा पांग्राको संयुक्त व्हिल–एसेम्ब्लीमा पन्चर भएका दुइटा पांग्रा कतार एयरवेजसँग दैनिक भाडा तिर्ने सर्तमा सापटी मागिएको हो । मागेका पांग्रा शुक्रबारै काठमाडौंमा फेरेर शनिबार निगमको दिल्ली उडानमा कतार एयरवेजलाई फर्काइने निगमको तयारी छ ।
आरए२१८डी उडान नम्बरमा काठमाडौं फर्किएको निगमको वाइडबडीमा बिहीबार २ सय ५१ यात्रु काठमाडौं आउँदै थिए । राति अबेरसम्म पांग्रा फेर्न नसकिएपछि ती यात्रुलाई निगमकै खर्चमा दिल्लीमा होटलमा राखिएको थियो ।
यसअघि एउटा पांग्रा पन्चर हुँदा यसअघि कार्तिकमा निगमको न्यारोबडी पश्चिम अफ्रिकाको मालीमा ९ दिनसम्म ग्राउडेड भएको थियो भने यसअघि पांग्रा अभावले दिल्लीका दुइटा उडान प्रभावित भएका थिए । निगमले पांग्रा जगेडा राख्दा न्यूनतम ४०–५० लाख आर्थिक दायित्व थपिने भएकाले काठमाडौं बाहिरका १० वटा स्टेशनमा पांग्रा राख्न नसकिएको जनाएको छ ।
देशको एकमात्र राष्ट्रिय ध्वजाबाहक नेपाल एयरलाइन्सको जहाजको विश्वसनीयतामै पटक पटक प्रश्न उठ्दै आएको छ । नेपाल एयरलाइन्सका जहाजमा पटक पटक समस्या देखिदै आएका छन् ।
