२ जेठ, काठमाण्डौ ।
सरकारी निकायले दर्ता नगरिदिएर तनावमा परेका स्वदेशी मोटरसाइकल ‘यात्री’ अन्ततः कानुनी रूपमा दर्ता भएको छ। यात्री डिजाइन स्टुडियो प्रालि नामले कम्पनी दर्ता भएको हो। यात्रीले ३ वर्षअघि आफ्नो उत्पादन सार्वजनिक गरेको थियो। एक वर्षअघि नै आफ्नो उत्पादन डेलिभर गरे पनि कानुनी जटिलताका कारण बजार विस्तार हुन सकेको थिएन।
उक्त समाचार सार्वजनिक भएपछि सर्वसाधरणले सरकारलाई यातायातत व्यवस्था कार्यविधि संशोधनका लागि दबाब दिएका थिए। गत वैशाखमा यातायात व्यवस्था विभागले यातायात व्यवस्थापन कार्यविधि निर्देशिका २०६० संसोधन गरेपछि यात्रीलगायत अन्य स्वदेशी सवारी दर्ताको बाटो खुलेको हो।
यात्रीले सोमबार राति सामाजिक सञ्जाल फेसबुकमार्फत् मोटरसाइकल दर्ता भएको जानकारी गराएको छ। यात्रीले आफ्नो स्पेसियल सिरिजको यात्री पी–१ मोटरसाइकल दर्ता भएको बताएको छ। यात्रीले लेखेको छ , १५ मे । गत वर्ष आज हामीले हाम्रो विशेष सिरिज–१ प्रयोगकर्तालाई हाम्रो पहिलो P-1 डेलिभर ग¥यौं र आज एक वर्ष पछि, हामीले पहिलो ’मेड इन नेपाल’ गाडी दर्ता गरेका छौं, यात्री P-1 हाम्रा प्रयोगकर्ताहरू र हामीलाई अहिलेसम्मको यो यात्रामा साथ दिनुहुने सबैलाई सधैं कृतज्ञ ।
गत वैशाख १० गते प्रधानमन्त्री पुष्पकमल दाहाल प्रचण्डले यात्री निर्माण टिमलाई भेटेका थिए। भेटपछि उनले विभागलाई ‘यात्री’ मोटरसाइकल दर्ताका लागि कानुन बनाउन निर्देशन दिएका छन्। यात्रीको वैधानिक रुपमै दर्ता भएपछि सामाजिक संजालमा धेरैले यसको खुशी साटेका छन् ।
नेपाली काग्रेसका महामन्त्री विश्वप्रकाश शर्मा सकारात्मक समाचार अनि खुशी र बधाईको क्षण पनि हो यो ! भन्दै यात्रीलाई बधाई दिएका छन् । उनले लेखेका छन् , नकारात्मक कुरा जब आउँछ, प्रतिक्रिया जनाउन हामी सबै जोडले लाग्छौं । तर परिवर्तनको सकारात्मक खबर सम्प्रेषण गर्न भने हामी कमै ध्यान पु¥याइरहेका हुन्छौं ।
जरुरी छ परिवर्तनको खोजिमा नकारात्मक बिषयलाई प्रहार गरौं, तर रुपान्तरण र परिवर्तनको सुखद खबरलाई समाजमा सम्प्रेषण पनि गरौं । यातायात व्यवस्थापन निर्देशिका ०६० लाई सरकारले संशोधन गरेपछि नेपालमै उत्पादित विद्युतीय मोटरसाइकलको दर्ता प्रारम्भ भएको छ । सबैखाले `Made in Nepal´ लाई राज्यको प्रोत्साहन र जनताको साथ जरुरी छ ।
