९ भदौ, एजेन्सी ।
फिफा महिला विश्वकप फुटबलका क्रममा स्पेनिस फुटबल एसोसियसनका अध्यक्ष लुइस रुवियल्सले आफ्नो सहमति नलिएरै ओठमा चुम्बन गरेको जेनी हर्मोसोले बताएकी छन् । अस्ट्रेलियामा सम्पन्न फाइनलका क्रममा स्पेनले इंग्ल्यान्डलाई हराउँदै विश्वकपको उपाधि स्पेनले जित्दा लुइसले जेनीको ओठमा चुम्बन गरेका थिए ।
तर जेनीले लुइसको उक्त कार्यका लागि आफ्नो सहमति नभएको बताएकी हुन् । उक्त घटनालाई लिएर लुइसको चौतर्फी आलोचना हुनुका साथै उनको राजीनामा माग पनि बढ्दै गएको छ । तर लुइसले भने राजीनामा नदिने अडान लिएका छन् । उनले उल्टै शुक्रबार राजीनामा दिन अस्वीकार गर्दै उत्तेजक भाषणमा किस इच्छाबमोजिम गरिएको दाबी गरेका थिए ।
यसैबीच, स्पेनका ८१ जना खेलाडीले लुइसले पदबाट राजीनामा नदिएसम्म नखेल्ने चेतावनी दिएका छन् । यता स्पेनको सरकारले पनि ४६ वर्षीय लुइसविरुद्धको कारवाही प्रकृया अघि बढाएको छ । फिफाले पनि अनुसासनको कारवाहीको प्रकृया सुरु गरेको छ ।
स्पेनमा फुटबलका धेरै महत्त्वपूर्ण प्रायोजकहरूले पनि उनलाई कारबाहीको माग गरिरहेका छन् । रुवियल्स सन् २०१८ देखि स्पेनिस फुटबल महासंघका अध्यक्ष छन् । स्पेनी सरकारका धेरै मन्त्रीले पनि उनको व्यवहारको आलोचना गरेका छन् ।
