२८ भदौ,एजेन्सी ।
प्रविधि र विकासमा मारेको फड्कोले मिनि अमेरिकाको उपमा पाएको सिंगापुर र विश्वकै सबैभन्दा ठूलो सैन्य शक्तिसहित पहिलो अर्थतन्त्र बन्ने लक्ष्यमा रहेको चीनबीच संयुक्त सैन्य अभ्यास सम्पन्न भएको छ।चीन र सिंगापुरले सिंगापुरको जुरोङ क्याम्पमा पाँचौं दुई पक्षीय संयुक्त सैन्य अभ्यास सम्पन्न गरेका हुन् ।
एलिट चिनियाँ र सिंगापुरका स्थल सेनाले शहरी आतंकवाद बिरोधी अभ्यासमा मिश्रित टास्क फोर्स समूहहरुमा विभिन्न अभ्यास गरेका हुन् । दुवै सेनाका वरिष्ठ अधिकारीहरुले अभ्यासको सफल समापनको लागि बधाइ दिँदै भविष्यमा थप अभ्यास गर्दै जाने बताएको सिन्ह्वाले जनाएको छ ।
यसअघि सिंगापुरका नौसेनाले भारतीय सेनासँग द्विपक्षीय सैन्य अभ्यास गरेका थिए । भारतसँग संयुक्त अभ्यास दुई देशका नौसेनाबीच हासिल भएको पारस्परिकताको प्रष्ट प्रमाण भएको दुवै देशले बताउने गरेका छन् । सिङ्गापुर–भारत सामुद्रिक द्विपक्षीय अभ्यास २८ औं संस्करण पूरा भईसकेको छ ।
