४ असोज, एजेन्सी ।
पोल्याण्ड र युक्रेनबीच गहुँको विषयलाई लिएर तनाव बढेको छ । गहुँको आयातलाई लिएर दुई देशबीच तनाव बढ्दै जाँदा पोल्याण्डका प्रधानमन्त्री मतेउज मोराविकीले टेलिभिजनमार्फत सम्बोधन गर्दै युक्रेनलाई हतियार नदिने घोषणा गरेका छन् । मोराविकले अब पोल्याण्डलाई नै आधुनिक हतियारले सुसज्जित गर्ने पनि बताएका छन् ।
प्रधानमन्त्रीले भनेका छन्, ‘अबबाट हामी युक्रेनलाई हतियार प्रदान गर्दैनौं । किनभने अब हामी पोल्याण्डलाई नै अत्याधुनिक हतियारले सुसज्जित गर्छौं,’ । दुई छिमेकीबीच गहुँलाई लिएर विवाद रसियाले युक्रेनमाथि आक्रमण सुरु गरेयता नै भएको थियो । तर, ब्ल्याक सीको सिपिङ लेन नै बन्द गरेपछि युक्रेनले नयाँ रुटहरु खोज्नु परेको थियो ।
जसकारण मध्य युरोपमा धेरै संख्यामा गहुँ ‘होल्ड’ भएका थिए । त्यसपछि युरोपियन युनियनले बलगेरिया, हंगेरी, पोल्याण्ड, रोमानिया र स्लोभाकियामा गहुँ आयात गर्न रोक लगाएको थियो । युक्रेनको गहुँका कारण स्थानीय बजारमा मूल्य घटिरहेको भन्दै चिन्तित बनेका किसानलाई फाइदा पुग्ने गरी सो निर्णय लिइएको थियो । सो प्रतिबन्ध सेप्टम्बर १५ मा सकिएको थियो ।
र, युरोपियन युनियनले त्यसलाई फेरि लागू गरेन । तर, हंगेरी, स्लोभाकिया र पोल्याण्डले भने गहुँ आयात नगर्ने पहिलाकै निर्णयलाई जारी राख्यो । त्यसपछि युक्रेनले वर्ल्ड ट्रेड अर्गनाइजेशन (डब्लुटीओ)मा ती राष्ट्रहरुविरुद्ध उजुरी दियो । युक्रेनले ती राष्ट्रहरुले अन्तर्राष्ट्रिय दायित्तवहरुको विरुद्ध गरेर कार्य गरेको आरोप लगाएको छ ।
युक्रेनका व्यापार मन्त्री युलियन सिभरीडेन्कोले ईयुका सदस्य राष्ट्रले एक्लैले युक्रेनका सामानहरु आयातमा प्रतिबन्ध लगाउन नसक्ने बताएका छन् । तर पोल्याण्डले भने प्रतिबन्धलाई जारी राख्ने र डब्लुटीओमा गरिएको उजुरीले आफूहरुलाई खुसी नबनाएको जनाएको छ । पोल्याण्डका प्रधानमन्त्रीले युक्रेनले गहुँको विषयलाई थप उक्साए युक्रेनबाट आयात हुने अन्य सामानमा पनि रोक लगाउने चेतावनी दिएका छन् ।
गहुँ आयातमा प्रतिबन्ध लगाए पनि तीन देशले आफ्नो भूमिबाट युक्रेनको गहुँ निर्यातमा कुनै रोक नलगाउने जनाएको छ । युक्रेनका राष्ट्रपति भोलोदिमिर जेलेन्सकीले गहुँकै विषयलाई लिए संयुक्त राष्ट्रसंघमा दिएको अभिव्यक्तिपछि पोल्याण्ड थप आक्रामक भएको हो । जेलेन्सकीले पोल्याण्डको नाम नलिइ रसियालाई फाइदा पु¥याइरहेको संकेत गरेका थिए ।
जसको विरोधमा पोल्याण्डले युक्रेन राजदूतलाई बोलाएर आपत्तिसमेत जनाएको थियो । यस्तै संयुक्त राष्ट्रसंघको महासभामा सहभागी हुन पुगेका जेलेन्स्की र मोराविकीले एकअर्कालाई भेटेनन् । ‘युक्रेनलाई पोल्याण्डले जसरी अरु कुनै देशले सहयोग गरेको छैन ।
राष्ट्रपति जेलेन्सकीले यो भुल्न हुँदैन। अहिले हाम्रो सरकार पोलिस जनता र किसानको लागि चिन्तित छ,’ पोल्याण्डका मन्त्री ज्याक ससिनले भनेका छन् । पोल्याण्डको यो निर्णयले युद्धको चपेटाबाट गुज्रिरहेको युक्रेनलाई थप समस्यामा पार्ने देखिएको छ ।
