१२ असोज, एजेन्सी ।
ताइवानले आफ्नो पहिलो स्वदेशी पनडुब्बी विश्वसामु प्रस्तुत गरेको छ । बिहीबार ताइवानका राष्ट्रपति साई इङ वेनले यस पनडुब्बीको प्रशंसा गर्दै चिनियाँ सेनाको आक्रमणको बढ्दो खतराको बीचमा यसले प्रतिरोधात्मक क्षमता प्रदान गर्ने बताएकी छन् । यो डिजेल–विद्युतीय पनडुब्बी ताइवानको काओसिङ शहरमा रहेको शिपयार्डमा आयोजित एक कार्यक्रममा अनावरण गरिएको हो।
यसलाई ‘नर्वल’ वा ‘समुद्री राक्षस’ नाम दिइएको छ। ताइवानी राष्ट्रपतिले भनेकी छन् कि यो पनडुब्बीले देशको रक्षाप्रति ठोस प्रतिबद्धता देखाउँछ। ताइवानका राष्ट्रपतिले भविष्यको तयारीका हिसाबले यो हाम्रो नौसेनाका लागि प्रमुख हतियार भएको छ । उनले ’धेरै वर्षदेखि मानिसहरूले हामीलाई पनडुब्बी बनाउन असम्भव छ भन्ने सोचेका थिए तर हामीले बनाएका छौं भन्दै खुशी ब्यक्त गरेकी छन् ।
साई इङ वेन को लागि यो एक धेरै विशेष अवसर थियो किनभने २०१६ मा सत्तामा आउँदा उनले पनडुब्बीहरू निर्माण गर्न आदेश दिएकी थिइन्। अहिले उनले सत्ता छोड्न लागेपछि यो पनडुब्बी तयार भएको छ । ताइवानी सेनाका प्रमुखहरूले पनि यो पनडुब्बीले चीनलाई आक्रमण गर्नबाट रोक्न निकै प्रभावकारी साबित हुने आशा व्यक्त गरेका छन् ।
चीनले ताइवान आफ्नो अभिन्न अंग भएको दाबी गरेको छ र प्रायः आफ्नो लडाकु विमान र युद्धपोत पठाएर ताइवानलाई धम्की दिदै आएको छ । ताइवानले विश्वलाई आफ्नो पनडुब्बी अवश्य देखाएको छ तर सुरक्षा कारणले आफ्नो शक्ति खुलासा गरेको छैन। यस कार्यक्रममा ताइवानका लागि अमेरिकी राजदूत सान्ड्रा ओडकिर्क पनि सहभागी थिए ।
साथै जापान र दक्षिण कोरियाका राजदूतहरुको समेत सहभागिता रहेको थियो । साई इङ्ग–वेनले आफ्नो सम्पूर्ण कार्यकालमा पनडुब्बी परियोजनालाई प्राथमिकतामा राखेकी थिइन्। सन् २०२५ सम्ममा ताइवानसँग ३ वटा पनडुब्बी हुने बताइएको छ । ताइवानसँग पहिले नै दुई डच पनडुब्बीहरू छन्, जुन १९८० को दशकमा समावेश गरिएको थियो।
ताइवानले आफ्नो नौसेनामा जम्मा ८ वटा स्वदेशी पनडुब्बी समावेश गर्ने योजना बनाएको छ । ताइवानी विज्ञहरूका अनुसार यो पनडुब्बीले चीनलाई ताइवानलाई घेरा हाल्नबाट रोक्न महत्वपूर्ण भूमिका खेल्नेछ। ताइवानी पन्डुब्बीको विषयमा चीनले पनि तत्कालै प्रतिक्रिया दिएको छ ।
चीनको रक्षा मन्त्रालयले ताइवानको पहिलो पनडुब्बी प्रक्षेपणलाई अस्वीकार गर्दै यो राष्ट्रिय एकीकरणको लहरलाई रोक्ने अभ्यास मात्र नभएको बताएको छ। चीनको रक्षा मन्त्रालयका प्रवक्ता वरिष्ठ कर्णेल वु छियानले ताइवानमा स्वदेशी निर्मित पहिलो पनडुब्बी प्रक्षेपणको सन्दर्भमा आयोजित पत्रकार सम्मेलनमा यस्तो टिप्पणी गरेका हन् ।
प्रवक्ता वुले ताइवानको सत्तारुढ डेमोक्र्याटिक प्रोग्रेसिभ पार्टीका पदाधिकारीहरूले जतिसुकै हतियार किन्ने वा किनेको भए पनि उनीहरूले राष्ट्रिय एकीकरणको सामान्य प्रवृत्ति वा पिपुल्स लिबरेसन आर्मी (पीएलए)को दृढ संकल्प, दृढ इच्छाशक्ति र शक्तिलाई रोक्न नसक्ने बताएका छन् ।
