२० असोज, एजेन्सी ।
आईसीसी एकदिवसीय विश्वकप क्रिकेटमा पाकिस्तानले विजयी शुरुवात गरेको छ । शुक्रबार भएको खेलमा पाकिस्तानले नेदरल्यान्ड्सलाई ८१ रनले हराउँदै विजयी शुरुवात गरेको हो । जितका लागि २ सय ८७ रनको लक्ष्य पछ्याएको नेदरल्यान्ड्स ४१ ओभरमा २ सय ५ रनमा अलआउट भयो । नेदरल्यान्ड्सका बास डि लिडले सर्वाधिक ६७ र विक्रमजित सिंहले ५२ रन बनाए । लोगन भान विक २८ रनमा अविजित रहे ।
उसका अन्य कुनै पनि खेलाडीले राम्रो प्रदर्शन गर्न सकेनन् । पाकिस्तानका तीव्र गतिका बलर हरिस रौफले ३ विकेट लिए । हसन अलीले २ तथा शाहिन शाह अफ्रिदी, इफ्तिखर अहमद, मोहम्मद नवाज र शादब खानले समान एक विकेट लिए । त्यसअघि हैदराबादमा टस हारेर पहिला ब्याटिङ गरेको पाकिस्तान ४९ ओभरमा २ सय ८६ रनमा अल आउट भएको थियो ।
पाकिस्तानका मोहम्मद रिजवान र साउद सकिलले सर्वाधिक समान ६८ रन जोडे।नेदरल्यान्ड्सका बास डी लिडले ४ विकेट तथा कोलिन एकरम्यानले २ विकेट लिए । अस्ति भएको उद्घाटन खेलमा न्युजिल्यान्डले इङ्ग्ल्यान्डलाई ९ विकेटले हराएको थियो । विश्वकपमा आज दुई खेल हुँदैछन् । बङ्लादेश र अफगानिस्तानबीच धर्मशालामा खेल शुरु भएको छ ।
त्यस्तै, दिउँसो सवा दुई बजे दिल्लीमा दक्षिण अफ्रिका र श्रीलङ्का खेल्नेछन् । हिमाचल प्रदेश क्रिकेट एसोसिएसन स्टेडियममा जारी खेलमा बंगलादेश र अफगानिस्तान दुबै विजयी सुरुवात गर्न चाहन्छन् । दुबैको स्पिन आक्रामण मजबुत छ । अफगानिस्तानका राशिद खान, मोहम्मद नाबी र मुजिब उर रहमानको स्पिन आक्रामण खेल्न बंगलादेशी ब्याटरलाई सहज हुनेछैन ।
अफगानिस्तानको शीर्षक्रम ब्याटिङ मजबुत छ । ओपनर रहमानउल्लाह गुरबाज, इब्राहिम जद्रान र रमाहत शाह प्रमुख ब्याटर हुन् । गुरबाज र जद्रान प्रमुख ब्याटर हुन् । यी दुई खेलाडीको प्रदर्शन महत्वपूर्ण हुनेछ । युवा ब्याटर जद्रानले पनि लगातार राम्रो प्रदर्शन गर्दै आएका छन् । अफगानिस्तानको मध्यक्रम र तीव्र गतिको बलिङ तुलनात्मक रुपमा कमजोर छ ।
उता बंगलादेशका ओपनर लिटन दास, मुश्ताफिजुर रहमान र तौहिद हृदोय प्रमुख ब्याटर हुन् । यी तीन ब्याटरको प्रदर्शन महत्वपूर्ण हुनेछ । युवा ब्याटर तानजिद हसन र नाज्मुल हसन सान्टो पनि राम्रो ब्याटिङ गर्दछन् । कप्तान सकिब अल हसन टोलीका प्रमुख हतियार हुन् । तीव्र गतिका बलरमा तस्किन अहमद, मुश्ताफिजुर रहमान र तान्जिम सकिब हसन हुनेछन् ।
अर्को खेलमा श्रीलंका चोटका कारण कमजोर बनेको छ । प्रमुख स्पिनर वानिन्दु हसरंगा विश्वकप टोलीमा छैनन् । अर्का स्पिनर महेश थिक्सेना पनि आजको खेलमा उपलब्ध हुनेछैनन् । त्यसैले बलिङ आक्रामण कमजोर बनेको छ । कुशल मेन्डिस टोलीका प्रमुख ब्याटर हुन् । कुशल परेरा, चरथि असलंका र कप्तान दासुन शानका पनि राम्रो ब्याटिङ गर्नसक्छन् ।
पथिसा पाथिराना प्रमुख तीव्र गतिका बलर हुन् । दक्षिण अफ्रिका उच्च मनोबलका साथ भारत आएको छ । ओपनर क्विन्टन डि कक, हेनरिक क्लासेन, एडेन माक्ररम र डेविड मिलर जस्ता विश्वचर्चित ब्याटर छन् । यी चार मध्य एकले ठूलो इनिङ खेल्नुपर्ने हुन्छ ।
दक्षिण अफ्रिकाको तीव्र गतिको बलिङ आक्रामण मजबुत छ । कागिसो रबाडा,लुन्गी एनगिडी र जेराल्ड कोट्जी तीव्र गतिका बलरको रुपमा हुनेछन् । कप्तान टेम्बा बभुमाले पनि ओडिआईमा पछिल्लो समय राम्रो ब्याटिङ गर्दै आएका छन् ।
