१७ पुष,काठमाण्डौ ।
विशेष अदालतले सम्पत्ति शुद्धीकरणमा दुईजना भारतीय नागरिकलाई ९० करोड ३७ लाख ६६ हजार रुपैयाँ जरिवाना हुने फैसला गरेको छ । यही पुस ४ गते अदालतले उनीहरूले नक्कली फर्म खडा गरी करोडौँ रुपैयाँ बैंकिङ च्यानलबाट भारत पठाएको मुद्दामा कसुर ठहर गरेको थियो ।
विशेष अदालतका अध्यक्ष न्यायाधीश टेकनारायण कुँवर तथा न्यायाधीशहरू रामबहादुर थापा र मुरारीबाबु श्रेष्ठको इजलासले भारतीय नागरिक प्रमोदकुमार जैसवाल र पप्पु ठाकुरलाई दोषी ठहर गरेको थियो । सोमबार जैसवाललाई बिगो ४१ करोड ५१ लाख ६९ हजार २७५ कायम गरी ८३ करोड तीन लाख तीनहजार ८५० रुपैयाँ जरिवाना र आठ वर्ष कैदको सजाय निर्धारण गरेको हो ।
अर्का प्रतिवादी भारतीय नागरिक ठाकुरलाई तीन करोड ६७ लाख १४ हजार बिगो कायम गरी त्यसको दोब्बर सात करोड ३४ लाख २८ हजार जरिवाना र पाँच वर्ष कैद हुने फैसला भएको हो । दुवै जनाविरुद्ध सम्पत्ति शुद्धीकरण अनुसन्धान विभागले २०७७ वैशाख २ गते विशेष अदालतमा दर्ता गराएको सम्पत्ति शुद्धिकरणसम्बन्धी मुद्दामा विशेष अदालतका न्यायाधीशत्रय टेक नारायण कुँवर, राम बहादुर थापा र मुरारीबाबु श्रेष्ठले गत पुस ४ गते कसुर ठहर गरेका थिए ।
सोही मुद्दामा सोमबार सजाय निर्धारण गर्दै न्यायाधीशत्रय कुँवर, थापा र श्रेष्ठले जयसवाललाई सजाय सुनाएको हो । विशेष अदालतका प्रवक्ता धन बहादुर कार्कीका अनुसार सम्पत्ति शुद्धीकरण निवारण ऐन, २०६४ को दफा ३०९१० अनुसार प्रतिवादी प्रमोद कुमार जयसवाललाई बिगो रहेको ४१ करोड ५१ लाख ६९ हजार २७५ रुपैयाँको दोब्बरले हुन आउने ८३ करोड ३ लाख ३८ हजार ८५० रुपैयाँ जरिवाना गरिएको हो ।
साथै उनलाई ८ वर्षको जेल सजायसमेत हुने फैसलामा उल्लेख छ । नक्कली कागजात खडा गरी कम्पनी दर्ता गरी नेपाली रुपैयाँलाई भारतीय रुपैयाँमा रुपान्तरण गरी सम्पत्ति शुद्धीकरण गरेको भन्दै उनीहरुमाथि मुद्दा चलेको थियो । उनीहरुले हुण्डीको समेत कारोबार गरेको उजुरी परेको भएपनि त्यस विषयमा भने प्रमाण नपुगेको भन्दै मुद्दा चलेको थिएन । विभागको माग दाबी अनुसार विशेष अदालतले फैसला गरे पनि उनीहरू अझै पक्राउ परेका छैनन् ।
