२६ पुष, काठमाण्डौ ।
नेपालगञ्ज उपमहानगरपालिकाले नियन्त्रणमा लिएका अवैध रूपमा सञ्चालित इ–रिक्सा नष्ट गर्न थालेको छ । लामो समयदेखि इ–रिक्सा व्यवस्थापनमा लागेको उपमहानगरपालिकाले आवश्यक कागजात र वैधता पुष्टि गर्न नसकेका इ–रिक्सा नष्ट गर्न थालेको हो । गत मंसिर १९ गतेदेखि अवैध रूपमा सञ्चालित इ–रिक्सा नियन्त्रण अभियान थालेको उपमहानगरपालिकाले पछिल्लो समय पाँचवटा इ–रिक्सा नष्ट गरेको छ ।
आवश्यक कागजात नभएका ती इ–रिक्सा प्राविधिक जाँच गरी स्काभेटरले तोडफोड गरी नष्ट गरिएको हो । यातायात कार्यालय बाँकेका मेकानिकल सुपरभाइजर सुशील शर्माले इ–रिक्सा धनी तथा चालककै रोहवरमा कागजात अद्यावधिक भए÷नभएका, चेसिज नम्बर मिले÷नमिलेको वा भए÷नभएको प्राविधिक जाँच गरेका थिए ।
उपमहानगरपालिकाले इ–रिक्सा नियन्त्रण गर्नुअघि पटक–पटक प्रक्रिया पु¥याउन आग्रह गरेको थियो । नियन्त्रणमा लिइसकेपछि पनि १५ दिने सूचना जारी गरेर इ–रिक्साका कागजपत्र अद्यावधिक गर्न समय दिइएको थियो । नगर प्रमुख प्रशान्त विष्टले नगरमा अवैधरूपमा सञ्चालित इ–रिक्सा पूर्णरूपमा सञ्चालनमा प्रतिबन्ध लगाउने अभियानमा उपमहानगरपालिका दृढ भएर लागेको बताएका छन् ।
‘हामीले पटक–पटक भनेका हौं, अद्यावधिक गर्न समय पनि दिएका थियांै, नियन्त्रणमा लिइएका धेरै इ–रिक्साले आवश्यक कागजात अद्यावधिक गरेपछि हामीले छाडेका छौं, अवैध सञ्चालित इ–रिक्सा हामीले नष्ट गर्न शुरु गरेका छौं’– नगर प्रमुख विष्टले भनेकाछन्, ‘अब हामी निरन्तर अगाडि बढ्छौं, नीति नियम र कानुन भन्दा बाहिर गएर चल्ने छुट कसैलाई छैन ।’
उपमहानगरपालिकाले हालसम्म छ सय २३ इ–रिक्सा नियन्त्रण लिएको छ । तीमध्ये आवश्यक कागजात र प्रक्रिया पु¥याएपछि पाँच सय ३८ इ–रिक्सा फिर्ता भएका छन् । अझै पनि ८५ इ–रिक्सा नियन्त्रणमै छन् । ती इ–रिक्सामाथि पनि छानबिन भइरहेको उपमहानगरले जनाएको छ । तराईका जिल्लाहरुमा अहिले इ रिक्साको प्रयोगले व्यापकता पाएको छ ।
कुनै बेला रिक्सा नै रिक्साले भरिने सडकमा अहिले इ रिक्सा मात्रै देखिने गरेका छन् । केही समयअघि इटहरी उपमहानगरले पनि रिक्साका कारण सडकमा असहज भएको भन्दै टाइमकार्ड लागू गरेको थियो । यस्तै कोशी प्रदेशको राजधानी विराटनगरमा समेत इरिक्साको संख्या अत्यधिक रहेको छ ।
यसअघिका मेयर भीम पराजुलीले रिक्सा संचालनका लागि कोटा निर्धारण गर्ने गरी नियन्त्रणको प्रयास गरेपछि चालकहरुको विरोधपछि विराटनगरमा पनि इरिक्साले व्यापकता पाएको छ । अत्याधिक रिक्साकै कारण सडकमा ट्राफिक समस्या हुनुका साथै दिनभरिमा ग्राहक समेत नपाउने समस्या भोग्नु परेको इरिक्सा चालकहरुले बताउने गरेका छन् ।
