१२ माघ,विराटनगर ।
शान्ति सुरक्षा कायम गर्ने क्रममा प्रर्दशनकारीहरुबाट जलाइएको मोटरसाइकलको सरकारले क्षतिपूर्ति नदिएपछि धनुषाका एक शसस्त्र प्रहरी जवानले क्षतिपूर्तिका लागि गुहार लगाएका छन् ।
मधेश प्रदेशको धनुषा जिल्लास्थित हंसपुर नगरपालिका सुगानिकासस्थित प्रहरी कार्यालयमा गएको पुस ६ गते स्थानीयले आक्रमण गरेपछि शान्ति सुरक्षाका लागि शसस्त्र प्रहरीको सुरक्षा बेस सोनिगामाबाट गएको शसस्त्र प्रहरीको टोलीले प्रयोग गरेको निजी मोटरसाइकल स्थानीयले आगजनी गरेका थिए ।
शसस्त्र बेसमा सरकारी सवारी साधन नभएको अवस्थामा शसस्त्र प्रहरी निरिक्षक हेमन्त लिम्बुको कमाण्डमा खटिएको टोलीले प्रयोग गरेको शसस्त्र प्रहरी जवान सुदीपकुमार साहको प्रदेश २–२–०२–००२ प ९८४७ नम्बरको मोटरसाइकल इलाका प्रहरी कार्यालयकै परिसर भित्र स्थानीयले आगजनी गरिदिएपछि क्षतिपूर्तिका लागि शसस्त्र प्रहरी बेस हुँदै जिल्ला प्रशासन कार्यालय धनुषा मार्फत गृहमन्त्रालयमा सिफारिस गरिएपनि अहिलेसम्म कुनै चासो नदिइएको प्रहरी जवान सुदिपले गुनासो गरेका छन् ।
नम्बर ८ गण धनुषा दरबन्दी भएका शसस्त्र प्रहरी जवान साहले आगजनीबाट पूर्ण नष्ट भएको मोटरसाइकल आफूले चलाएपनि आफ्नो दाजुको नाममा रहेको भन्दै आफुले २ वर्षको तलब जम्मा गरेर पनि बाइक किनेर दिन सकिने अवस्था नरहेको बताएका छन् ।
साहले भनेका छन्, सिपाइ मान्छे सुरक्षाका लागि जाँदा मोटरसाइकलमा आगजनी गरिदिए मैले २ वर्षको तलबले पनि मोटरसाइकल किन्न सक्दिन , यो कुरा माथिल्लो निकायले सुनिदियोस् । गएको पुस ९ गते भने स्थानीय सुगानिकासमा सोही स्थानमा शंकर ठाकुर र जय नारायणमण्डलबीच झगडा हुँदा जय नारायण घाइते भएका थिए । तर घाइतेलाई प्रहरी कार्यालय लगेर उपचारका लागि जनकपुर अस्पताल पठाउँदा चिकित्सकले मृत घोषणा गरेका थिए ।
घटनापछि जयनारायणलाई प्रहरीले नै नियन्त्रणमा लिएर थप कुटपिट गरेको र उपचारमा पठाउन ढिलाइ गरेको भन्दै २ सय जति स्थानीयले इलाका प्रहरी कार्यालयलाई घेराउ गरी ढुंगामुढा गरेपछि थप सुरक्षाका लागि शसस्त्र प्रहरी निरिक्षक लिम्बुको कमाण्डमा ६ जनाको टोली घटनास्थल पुग्दा प्रहरी जवान साहको मोटरसाइकल स्थानीयले तोडफोड गरी आगजानी गरिदिएका थिए । प्रहरी जवान साह अहिले धनुषाकै बेस क्याम्प सोनिगामामा कार्यरत रहेका छन् ।
