२२ माघ ,एजेन्सी ।
प्रि–सिजन टुरका लागि साउदी पछि हङकङ पुगेको अमेरिकी क्लब इन्टर मियामीको हङकङ–११ विरुद्धको मैत्रीपूर्ण खेलमा इन्टर मियामीले अर्जेन्टिनी कप्तान लियोनल मेसीलाई नखेलाएपछि हङकङ सरकार र समर्थक आक्रोशित बनेका छन् । आइतबार दिउँसो भएको खेलमा मियामीले मेसीबिनै हङकङ–११ विरुद्ध ४–१ को सहज जित निकालेको थियो ।
तर, मियामीले मेसीलाई बेन्चमै राखेपछि मैदानमा उपस्थित करिब ४० हजार समर्थक आक्रोशित बनेका हुन् । मेसी नखेल्ने भएपछि समर्थकले टिकट फिर्ता गर्न माग गर्दै मियामीका मालिक डेविड बेकह्यामले प्रतिक्रिया दिएका बेला गिज्याएका थिए । मेसी नखेलेका कारण हङकङ सरकारबाट आयोजक टयाटलर एसियाले रकम कटौतीको सामना गर्न सक्ने त्यहाँका स्थानीय सञ्चारमाध्यमले खुलाएका छन् ।
“मेसीले आज खेल नखेलेको सम्बन्धमा हङकङ सरकार र सबै फुटबल प्रशंसक आयोजकको व्यवस्थाबाट अत्यन्तै निराश छन् । आयोजकले सबै फुटबल प्रशंसकलाई स्पष्टीकरण दिनुपर्छ,” त्यहाँको सरकारको प्रमुख खेलकुद आयोजक समिति (एमएसइसी)ले जारी गरेको विज्ञप्तिमा उल्लेख छ, “एमएसईसीले नियम र सर्तहरूअनुसार आयोजकसँग फलो–अप कार्यहरू लिनेछ, जसमा मेसीले खेल नखेल्ने परिणामका रूपमा टिकटको रकम घटाउने सक्ने निर्णय समावेश गर्दछ ।
यतिबेला मियामी एसिया भ्रमणमा रहेको छ । उसले साउदीमा खेलिएको मैत्रीपूर्ण खेलेमा हार व्योहोरेको थियो । मियामीको टिम हङकङ पुग्दा स्टार स्ट्राइकर, ३६ वर्षीय विश्वकप विजेता, कप्तान मेसीलाई हेर्नेको भीड सडकमा उत्रिएको थियो । तर मेसीले ह्यामिस्ट्रिङको कारण देखाउँदै मैदान प्रवेश गरेनन् ।
दोस्रो हाफमा अधिकांश समय हजारौं समर्थकले मेसीलाई मैदान उतार्नका लागि नाराबाजी गरेपनि इन्टर मियामीले आफ्ना स्टारलाई मैदान उतारेन । समर्थकहरूले उक्त खेल हेर्नका लागि कम्तीमा १ हजार हङकङ डलर (१७ हजार नेपाली) रकम तिरेका थिए । समर्थकले मेसीसँगै स्वारेज पनि अनुपस्थित भएपछि आफूहरूको अवमूल्यन भएको भन्दै आक्रोश व्यक्त गरेका छन् ।
खेलपछि आयोजकले एक विज्ञप्ति जारी गर्दै खेल अघि मेसी र स्वारेज नखेल्नेबारे आफूहरूलाई इन्टर मियामीले केही जानकारी नदिएको बताएको छ । यद्यपि उसले मेडिकल टिमको सल्लाहअनुसार दुबैले नखेलेको बताएको छ । इन्टर मियामीका म्यानेजर गेराडो मार्टिनोले समर्थकहरूको चाहना आफूहरूले बुझेको बताएका छन् ।
