१ चैत, विराटनगर । विराटनगर महानगरपालिकाले पहिलोपटक ‘महानगर रोजगार मेला’ आयोजना गर्ने भएको छ ।
महानगरपालिकाले यही चैत २ र ३ गते विराटनगरस्थित वीरेन्द्र सभागृह छेउमा रहेको इको फ्रेन्डली पार्कमा ‘महानगर रोजगार मेला–२०८०’ आयोजना गर्दैछ ।
मेलाले रोजगारदाता र रोजगारीको खोजीमा रहेका जनशक्तिलाई जोड्ने महानगरको विश्वास रहेको छ ।
दैनिक जसो विदेश पलायन हुने युवा जनशक्तिलाई स्वेदशमै रोजगारीको अवसर सिर्जना गर्ने हिसाबले पहिलो पटक रोजगार मेलाको आयोजना गरिरहेको महानगरका मेयर नागेश कोइरालाले जानकारी दिए ।
रोजगार मेला महानगरले एक लाख तथा एक संस्थाबाट ६ लाख सहित ७ लाख रुपैयाँको लागतमा सुरु गर्ने तयारी गरिरहेको उनले बताए ।
क्षमता अनुसारका व्यक्तिले रोजगारी तथा संस्थाहरुले क्षमतावान कामदार, कर्मचारी नपाइरहेको अवस्थामा यस किसिमका कार्यक्रम एकदम आवश्यक रहेको र यसले निरन्तरता पाउने मेयर कोइरालाको दाबी रहेको छ ।
मेलामा प्राविधिक, प्रशासनिक, उद्योग र श्रमिक क्षेत्रका व्यक्तिहरूको सहभागिता हुनेछ । स्थानीय जनशक्तिलाई स्थानीयस्तरमै रोजगारी उपलब्ध गराउने उद्देश्यले आयोजना गर्न लागिएको महानगर रोजगार मेलामा विभिन्न उद्योग व्यवसायहरूबाट सीपयुक्त जनशक्तिको मागको रहेको छ ।
दक्षता अनुसारको रोजगारीको खोजीमा रहेका युवाहरू प्रत्यक्ष रोजगारदातासँग भेट, युवा जनशक्ति र रोजगारदातालाई जनशक्ति खोज्न र रोज्न सहयोग पुग्ने, स्थानीय क्षेत्रमा रहेका रोजगारका क्षेत्र, सूचना तथा अवसरको जानकारी र सीपमूलक तालिमहरूको अवसरसम्बन्धी जानकारी गराउने मेलाको लक्ष्य रहेको छ ।
“पहिलो पटक गर्न लागेको रोजगार मेलामा १५० जना युवालाई यकिन रुपमा शतप्रतिशत जागिर सुनिश्चत गर्नेछौँ” मेयरले भने, “महानगरले गर्नसक्ने सबै सहयोग गर्नेछ, मेलामा सहभागी हुन चाहने बेरोजगार युवाहरु सबै आउनुस्” ।
मेयर कोइरालाले मेलाबाट बढीभन्दा बढी लाभ उठाउन सबैलाई आग्रह गरेका छन् । उनले रोजगारी उपलब्ध गराउन सके युवा जनशक्तिहरु पलायत हुने दर घटेर जाने विश्वास व्यक्त गरे ।
यस मेलामा हजारौँ सहभागि रहने अनुमान गरिएको छ तर सहभागीमध्ये करिब १ सय ५० जनाका लागि रोजगारी सुनिश्चितका साथै अन्यले सूचना प्राप्त र प्रत्यक्ष भेटघाटको अवसर पाउनेछन् ।
मेलामा विराटनगर बाहिरका मानिसहरुले पनि सहभागीता जनाउन पाउँनेछन् । मेलामा उद्योग, हस्पिटल, होटेल, बैंक तथा वित्तीय संस्था, शैक्षिक परामर्श केन्द्र, रोजगार केन्द्रका करिब ४० वटा स्टल समावेश हुने मेयर कोइरालाले बताएका छन् ।
मेलामा इन्ट्री निःशुल्क हुनेछ । विराटनगरस्थित वीरेन्द्र सभागृह छेउमा रहेको इको फ्रेन्डली पार्कमा बिहान १० देखि ५ बजेसम्म मेला सञ्चालन हुनेछ ।
