९ चैत, विराटनगर । विराटनगरस्थित न्यूरो कार्डियो एन्ड मल्टी स्पेसियालिटी हस्पिटलले २५ हजार भन्दा बढी छारे रोगका विरामीहरुको सफल उपचार गरेको छ ।
यही मार्च २६ मा विश्वभर आयोजना गरिने विश्व छारे रोग दिवसको अवसर पारेर आयोजना गरिने कार्यक्रमहरुका बारेमा जानकारी दिन आयोजित पत्रकार सम्मेलनमा न्युरोले यस्तो जानकारी दिएको हो ।
अहिले पनि न्युरोमा ३ हजार जना यसका विरामीहरु नियमित उपचारका क्रममा रहेको अस्पतालका प्रवन्धक भारत श्रेष्ठले जानकारी दिए ।
कार्यक्रममा प्रत्येक सय जनामा एकजनामा छारे रोग लाग्ने विभिन्न तथ्याङकहरुले देखाएको र बालबालिकाहरुमा यो रोग बढी देखिएको अस्पतालका अध्यक्ष तथा वरिष्ठ न्युरोलोजिष्ट डा. बिरेन्द्रकुमार बिष्टले जानकारी दिए ।
विश्व छारे रोग दिवसका अवसरमा न्युरोले यही चैत १३ गते सचेतनामुलक प्रभात फेरीको आयोजना समेत गरेको छ ।
विहान अस्पताल परिसरबाट सुरु हुने प्रभात फेरीले नगरको विभिन्न क्षेत्रको परिक्रम गर्ने कार्यक्रम रहेको प्रवन्धक श्रेष्ठले जानकारी दिएका छन् ।
विभिन्न प्लेकार्ड, व्यानर सहित निकालिने ¥यालीले नगरको परिक्रममा गर्दै जनचेतना फैलाउने उनले बताएका छन् ।
यस्तै १४ गते न्युरोले अनुभव साटासाटको कार्यक्रम राखेको छ । यस्तै दिवसकै अवसरमा न्युरोले ११ गते देखि १६ गतेसम्म निःशुल्क ओपिडी सेवा दिने घोषणा समेत गरेको छ ।
न्युरोले छारे रोगसम्बन्धी निबन्ध प्रतियोगिता समेत आजै सम्पन्न गरेको छ । अस्पतालका अध्यक्ष डाक्टर विष्टका अनुशार छारे रोग अन्धविश्वासको घटक नभई एउटा नशासम्बन्धि समस्या हो ।
छारे रोग नशा सम्बन्धी रोगको लक्षण हो तर यसप्रति व्याप्त अन्धविश्वास, भ्रम तथा रुढीवादी परम्पराले गर्दा यस रोगका बिरामीहरु सही उपचार नपाएर गाउँघरमा अल्मलिने गरेका छन् ।
सही समयमा सही उपचार पाएको खण्डमा यस्ता विरामी निको हुन्छन् र सामान्य जिवन व्यतित गर्न सक्छन् ।
न्युरोले छारे रोगको उपचारका लागि चाहिने सम्पूणै उपकरणहरु तथा विशेषज्ञ टिम आफूहरुसँग रहेको बताएको छ ।
न्यूरो अस्पतालमा कोशी प्रदेशसहित छिमेकी राष्ट्र भारतका सीमावर्ती क्षेत्रमा सर्वसाधारण पनि उपचारका लागि आउने गरेका छन् ।
