११ चैत , एजेन्सी ।
रुसको राजधानी मस्कोमा एक सांगीतिक कार्यक्रममा हिजो भएको आक्रमणमा एक सय ३३ जनाको मृत्यु भएपछि त्यसको रिस रुसले युक्रेनमाथि फेरेको छ । रुसले युक्रेनको राजधानी किभमा ठूलो आक्रमण गरेको छ । रुसी सेनाले किभमा शृङ्खलाबद्ध हवाई हमला गरेको हो । रुसको हमलापछि युक्रेनले आइतवार पूरै देशभरमा अलर्ट जारी गरेको छ ।
आक्रमणको चलिरहँदा किभमा बसोबास गर्ने युक्रेनीहरू शरण लिन मेट्रो स्टेसनतिर दौडिरहेको दृश्य स्थानीय सञ्चारमाध्यमहरूले देखाएका छन् । रुसको यो हमलासँगै युक्रेनको छिमेकी राष्ट्र पोल्यान्डले पनि आफ्नो वायुसेनालाई तयारीमा अवस्थामा राखेको छ । आफ्नो सीमानामा रहेको युक्रेनी शहर लविबमा रुसले हवाई हमला गरेपछि पोल्यान्डले आफ्नो हवाई क्षेत्रको निगरानी बढाएको हो ।
किभमा रुसी आक्रमण शनिवार बिहान ५ बजे शुरू भएको थियो । युक्रेनको सेनाले रुसको हवाई आक्रमणको कडा जवाफ दिएको जनाएको छ । शुक्रवार पनि रुसले दर्जनौं मिसाइल प्रहार गरेको थियो । युक्रेनी राष्ट्रपति भोलोडिमिर जेलेन्स्कीले रुसी राष्ट्रपति भ्लादिमिर पुटिनले मस्कोको कन्सर्ट हलमा भएको आक्रमणको लागि आफ्नो देशलाई दोष दिन चाहेको दाबी गरेका छन् ।
शुक्रबार मस्कोको कन्सर्ट हलमा बन्दुकधारीले अन्धाधुन्ध गोली चलाउँदा १३३ जनाको मृत्यु भएको थियो । रुसी राष्ट्रपति पुटिनले आक्रमणमा संलग्न चार जनालाई पक्राउ गरिएको बताएका छन् । जेलेन्स्कीले भने, ‘शुक्रबार मस्कोमा के भयो, त्यो स्पष्ट छ। तर पुटिन र केही अन्य मानिसहरूले आक्रमणको दोष अरू कसैमाथि लगाउन खोजिरहेका छन्।
वास्तवमा पुटिनले आक्रमणपछि आक्रमणकारी युक्रेनतर्फ भागिरहेको बताएका थिए । मस्कोको बाहिरी भागमा रहेको क्रोकस सिटी हलमा आतंककारीहरूले आक्रमण गरेका थिए । यो २० वर्षमा रुसमा भएको सबैभन्दा घातक हमला हो। चार संदिग्ध आक्रमणकारी सहित ११ जना पक्राउ परेका छन् । आइएसआइएसले नरसंहारको केही घण्टापछि भिडियो सार्वजनिक गरेको छ ।
