१३ चैत , विराटनगर ।
विराट समुदाय विकास केन्द्रले स्थानीय नगरपालिकाका निर्वाचित महिला सदस्यहरूको सशक्तिकरण, सेवा स्रोत र उपकरणहरूमा पहुँच र प्रभावकारी नेतृत्व विकासका लागि क्षमता अभिवृद्धि तालिमको आयोजना गरेको छ ।
विराट समुदाय विकास केन्द्रले अस्ट्रेलियन एडको सहयोगमा चार दिने तालिमको आयोजना गरेको हो ।
आइतबार विराटनगर महानगरपालिकाका मेयर नागेश कोइरालाको उपस्थितमा उक्त तालिमको समापन पनि गरिएको छ ।
यस चार दिने सशक्तिकरण, सेवा स्रोत र उपकरणहरूमा पहुँच र प्रभावकारी नेतृत्व क्षमता अभिवृद्धि तालिममा सशक्तिकरण, व्यक्तित्व विकास, सञ्चार, लैंगिक समानतालगायत विभिन्न शीर्षकका बारेमा प्रकाश पोखरेल, विराटनगर महानगरपालिकाका प्रतिनिधि सरोज गौतम र कार्यक्रमकी सहजकर्ता प्रमिला थापाले सहजीकरण गरेका थिए ।
विराटनगरका सबै वडाहरुबाट करिब ६० जना जनप्रतिनिधि, स्वास्थ्यस्वयंमसेविका, राजनीतिक दलहरुमा समेत आबद्ध महिला उद्यमी, पूर्वसांसद्, सञ्चारकर्मीहरुको सहभागीता रहेको थियो ।
अहिले राज्यले महिलाहरुलाई स्थानीय निकायमा ४० प्रतिशत महिलाहरुको सहभागीता सुनिश्चित गरेको र ती ४० प्रतिशत महिला सक्षम होउन् भन्ने उद्देश्यले कार्यक्रमको आयोजना गरिएको सहजकर्ता थापाले बताइन् ।
महिलाहरुको सहभागिता स्थानीय तहमा देखिएपनि सहभागी महिलाहरु सक्षम नभएको र उनीहरुलाई सधै पछि पर्ने भएकाले ती महिलाहरुले आफ्नो आवाज आफै राख्न सकुन् भनेर सशक्तिकरण गर्न कार्यक्रम आयोजना गरिएको उनले बताइन् ।
कार्यक्रमको समापनका अवसरमा सहभागी जनप्रतिनिधिहरुसँग मेयर नागेश कोइरालाको उपस्थितमा अन्तरक्रियात्मक कार्यक्रम पनि भएको छ ।
जहाँ प्रतिनिधिहरुले भोगेका सम्स्याहरु पनि मेयर सामू राखेका थिए । मेयर कोइरालाले महानगरमा ६४ करोड गतवर्ष कमाई भएकोमा ३५ करोड बढी पूरानो भुक्तानी गरेपछि महानगरसँग पैसा नरहेको बताए । पैसा नभएका कारण खर्च कटौती गर्नुपर्ने र बजेटिङमा समेत समस्या भएको स्वीकार गरे ।
महानगरपालिकाले सशक्तिकरण, शीपमूलक आदी बेलाबेला विभिन्न किसिमका तालिमहरु आयोजना गरिरहेको तर तालिम दिँदादिँदै पनि महिलाहरुले त्यो कुरालाई व्यवहारमा नउतार्दा सक्षमता नदेखिएको मेयर कोइरालाले गुनासो गरे ।
वडाका प्रतिनिधिहरु महानगरकै अंग भएकाले फिल्डमा जाँदा महानगरमा भएको समस्याहरु खुलेर महानगरबासी सामू राख्न अनुरोध गरे ।
वडामा दिइएको बजेटमा सम्बन्धित वडाका प्रतिनिधिहरुले नै चासो राखेर मुख्य कामलाई प्राथमिकता दिएर महानगर सामू एक स्वरमा ती कुराहरु राख्न पनि उनले अनुरोध गरेका छन् ।
यस्तै कार्यक्रमका मुख्य प्रशिक्षक प्रकाश पोखरेलले जनप्रतिनिधिलाई सहयोग होस्, महानगरको काम प्रभावकारी र सहज होस् भन्नकै लागि यस तालिमको आयोजना गरिएको स्पष्ट पारे ।
