३ वैशाख , एजेन्सी ।
इरानले कब्जा गरेको पानीजहाजमा रहेका १७ भारतीय चालक यतिबेला इरानमा बन्धक अवस्थामा रहेका छन् । यस विषयमा भारतीय विदेशमन्त्री एस जयशंकरले इरानका विदेशमन्त्री आमिर अब्दुल्लाहियानसँग फोनमा कुराकानी गरेका छन् । जयशंकरले एक्समा यस्तो बताएका हुन् । कुराकानीका क्रममा उनले इरानको कब्जामा रहेको मालवाहक जहाज एमएससी एरिजमा सवार चालक दलका १७ भारतीय सदस्यहरूलाई रिहा गर्न माग गरेको बताएका छन् ।
वार्तामा जयशंकरले मध्य पूर्व क्षेत्रको पछिल्लो अवस्था, बढ्दो तनाव आदिबारे कुराकानी गर्दै धैर्य अपनाउन र कूटनीतिक माध्यमबाट तनाव कम गर्नेबारे चर्चा गरेका थिए । इरानले शनिबार एक इजरायली अर्बपति व्यापारीको मालवाहक जहाज कब्जा गरेको थियो । यसको चालक दलमा १७ जना भारतीयहरू पनि थिए । पछिल्लो समय इजरायल र इरानबिच तनाव बढेको छ ।
अप्रिल १ मा सिरियामा रहेको दूतावासमा इजरायलले हमला गरेपछि सोको प्रतिकारमा इरानले इजरायलमाथि शनिबार बृहत् स्तरमा ड्रोन र मिसाइल प्रहार गरेको थियो । सो घटनापछि भारतले दुवै देशलाई संयम अपनाउन आग्रह गरेको छ । पछिल्लो समय इरानले कब्जामा लिएको इजरायली स्वामित्वको जहाजमा भारत सरकारका प्रतिनिधिहरूलाई भारतीय चालक दलसँग भेट्न अनुमति दिइने बताएको छ।
इरानको घोषणा भारतीय विदेशमन्त्री डा एस जयशंकर र उनका इरानी समकक्ष डा अमिर अब्दुल्लाहियानबीच आइतबार भएको फोन वार्तापछि आएको हो । यसै क्रममा इरानी विदेशमन्त्रीले भारतलाई इजरायलविरुद्धको कारबाहीबारे जानकारी गराएका छन् । इरानले जारी गरेको विज्ञप्तिमा भनिएको छ कि फोन वार्ताका क्रममा अमिर अब्दुल्लाहियानले आफ्ना भारतीय समकक्षीलाई इरानको वैध आत्मरक्षा र इजरायली शासनलाई सजायको बारेमा जानकारी गराएका थिए।
भारतीय विदेशमन्त्रीले कब्जामा लिएको जहाजमा रहेका १७ भारतीय चालक दलका सदस्यप्रति चिन्ता व्यक्त गर्दै यस विषयमा इरानसँग सहयोग मागेको पनि विज्ञप्तिमा उल्लेख छ । अब्दुल्लाहियानले आफूहरूले कब्जामा लिएको जहाजको बारेमा जानकारी सङ्कलन गरिरहेको र छिट्टै भारत सरकारका प्रतिनिधिहरूलाई जहाजमा रहेका चालक दललाई भेट्ने अवसर प्रदान गर्ने बताएका छन् ।
शनिबार इरानको इस्लामिक क्रान्तिकारी गार्ड कोरले कमाण्डोहरूमार्फत स्ट्रेट अफ हर्मुज नजिक इजरायलसँग जोडिएको भन्दै जहाज कब्जा गरेको थियो । इरानले कब्जा गरेको कार्गो जहाज युएईबाट भारत आउँदै थियो । रिभोलुसनरी गार्डले यो जहाज इजरायलसँग जोडिएको आरोपका कारण कब्जामा लिइएको बताएको थियो ।
एमएससी एरिस नामको यो जहाज लन्डनस्थित कम्पनी जोडियाक ग्रुप को हो । जसको स्वामित्व इजरायली अर्बपति इयान बोफरको रहेको बताइएको छ। जहाजलाई इरानले कब्जा गर्दा पोर्चुगलको झण्डा बोकेको थियो। जहाजमा चालक दलका २५ सदस्यमध्ये १७ भारतीय नागरिक रहेका छन् । जहाजको बारेमा जानकारी प्राप्त हुनासाथ भारतले चालक दलमा रहेका भारतीयको रिहाइका लागि पहल सुरु गरेको थियो ।
