३ वैशाख , काठमाण्डौ ।
लगातार दुई खेलमा अपराजित रहदै उच्च मनोबलका साथ आज ओमानमा जारी एसीसी प्रिमियर कप क्रिकेट प्रतियोगितामा हङकङविरुद्ध उत्रिएको नेपालले उत्कृष्ट प्रर्दशन गरेको छ । जारी खेलमा हङ्कङले नेपाललाई जितका लागि एकसय १५ रनको लक्ष्य दिएको छ । टस हारी पहिले ब्याटिङको निम्तो पाएको हङ्कङले १७.५ ओभरमा अलआउट हुनुअघि एक सय १४ रन बनाएको हो ।
हङ्कङलाई ठूलो योगफल बनाउनबाट रोक्न नेपाली टोलीका बलर अविनाश बोहराले तीन विकेट लिएका थिए । उनले चार ओभरमा २९ रन खर्चिए । दीपेन्द्रसिंह ऐरी र ललित राजवंशीले पनि दुई–दुई विकेट हात पारे । करण केसीले पनि एक विकेट लिए । हङ्कङका लागि ओपनर अन्शी रथले सर्वाधिक ३४ रन बनाए । जिसन अलीले १४ रन जोडे ।
कप्तान निजाकत खानले १२ र एहसान खानले ११ रन बनाए । अन्य ब्याट्सम्यानले भने दोहोरो अंकमा रन जोड्न सकेनन् । हङ्कङले अतिरिक्त रुपमा आठ रन पायो । जारी प्रतियोगितामा नेपालले खेलेको यो तेस्रो खेल हो । यसअघि नेपालले आफ्नो पहिलो खेलमा मलेसियालाई पाँच विकेटले र दोस्रो खेलमा कतारलाई ३२ रनले हराएको थियो ।
वर्षाका कारण १८ ओभरमा झारिएको खेलमा नेपाली बलरहरुले उत्कृष्ट प्रदर्शन गरेका छन् । टस हारेर बलिङ रोजेको नेपालले सुरुबाटै हङकङलाई दबाबमा राखेको थियो । नेपालले हङकङपछि समूह चरणको अन्तिम खेल वैशाख ५ गते साउदी अरबसँग खेल्नेछ ।
