३ वैशाख , एजेन्सी ।
बलिउड अभिनेता सलमान खानको बान्द्रास्थित ग्यालेक्सी अपार्टमेन्ट अगाडि गोली चलाइको घटनामा प्रहरीले सम्लग्नहरुको तस्विर सार्वजनिक गरेको छ । आइतबार विहान दुईवटा मोटरसाइकलमा गएका आक्रमणकारीले ४ राउण्ड फायर गरेका थिए । गोलीबारी हुँदा सलमान आफ्नै घरमा थिए ।
सो घटनापछि महाराष्ट्रका मुख्यमन्त्री एकनाथ शिन्देले सलमान खानसँग फोनमा कुरा गरेका थिए । शिन्देले मुम्बईका प्रहरी आयुक्तलाई सलमानको सुरक्षा बढाउन निर्देशन दिएका छन् । हाल अभिनेता खानको घरबाहिर सुरक्षा बढाइएको छ । एक भिडियोमा सलमान खानको घर ग्यालेक्सी अपार्टमेन्ट बाहिर आएको छ।
जसमा दुवै आक्रमणकारीले गोली हानेको देखिन्छ । मुम्बई प्रहरीलाई उधृत गर्दै भारतीय संचारमाध्यामहरुले उल्लेख गरेअनुसार गोली चलाइएको बन्दुक ७.६ बोरको थियो । फोरेन्सिक विज्ञहरूले घटनास्थलबाट गोली फेला पारेका छन्। प्रहरीले आरोपीको मोटरसाइकलसमेत नियन्त्रणमा लिएको छ ।
फोरेन्सिक टोलीले यसको अनुसन्धान गरिरहेको छ । दुवै अभियुक्त राज्य बाहिरका हुन सक्ने र उचाई ५ फिट ८ इन्च हुन सक्ने प्रहरीले जनाएको छ । प्रहरीले सलमानको घरबाहिर राखिएका सबै सीसीटीभी क्यामेराको डीभीआर जफत गरेको छ । घटनाको जिम्मेवारी लरेन्स बिश्नोई समूहले लिएको छ ।
एक फेसबुक पेजमा सो घटनाका बारेमा जिम्मेवारी लिएको सार्वजनिक भएको छ, जसमा सलमानमाथि भविष्यमा पनि आक्रमण हुनसक्ने लेखिएको छ । यसअघि २०२२ मा पनि सलमान खानलाई ज्यान मार्ने धम्की आएको थियो । त्यतिबेला सलमानलाई धम्कीपूर्ण चिठी पठाएर ज्यान मार्ने धम्की दिइएको थियो ।
सलमानले सधैँ मर्निवाक जाने ठाउँमा चिठी भेटेका थिए । सन २००८ मा पनि कालो हरिण मारेको घटनामा विश्नोइले सलमानलाई मार्ने धम्की दिएको थियो । बिश्नोई समुदायले कालो हरिणलाई पवित्र मान्ने भएकाले त्यसको शिकार गरेको आरोपमा लरेन्सले सलमान खानलाई मार्ने धम्की दिएका थिए ।
लरेन्स भने जेलमा सजाय काटिरहेका छन् । यसअघि उनले जेलभित्रबाटै एक टेफिभिजनमा अन्र्तवार्ता दिदै सलमान खानले माफी माग्नु पर्ने बताएका थिए । कालो हरिण प्रकरणमा भने सलमानले सजाय भोगिसकेका छन् ।
