४ वैशाख , एजेन्सी ।
इन्डियन प्रिमियर लिग (आईपीएल) क्रिकेटमा सनराइजर्स हैदराबादले गएराती भएको खेलमा आईपीएल इतिहासको सबैभन्दा धेरै योगफल बनाएर आफ्नै कीर्तिमान तोडेको छ । यसअघि मुम्बई इन्डियन्ससँगको खेलमा २ सय ७७ रन बनाएको हैदराबादले हिजो बेङ्गलुरुसँगको खेलमा २ सय ८७ रन बनायो । रनको वर्षा भभएको उक्त खेलमा हैदराबादले रोयल च्यालेन्जर्स बेङ्गलुरुलाई २५ रनले हरायो ।
हैदराबादले दिएको दुई सय ८८ रनको लक्ष्य पछ्याएको बेङ्गलुरुले २० ओभरमा सात विकेट गुमाएर दुई सय ६२ रन बनायो । बेङ्गलुरुका दिनेश कार्तिकले ८३, कप्तान फाफ डु प्लेसिसले ६२, विराट कोहलीले ४२ रन बनाए । हैदराबादका कप्तान प्याट कमिन्सले ३, मयंक मार्कंडेयले २ विकेट लिए । त्यसअघि एम चिन्नास्वामी स्टेडियममा टस हारेर पहिला ब्याटिङ गरेको हैदराबादले २० ओभरमा ३ विकेट गुमाएर दुई सय ८७ रन बनाएको थियो ।
हैदराबादका ट्राभिस हेडले १ सय २, हेनरिक क्लासेनले ६७ रन बनाए । हेडले ४१ बलमा ९ चौका र ८ छक्कासहित १०२ रनको सानदार शतकीय इनिङ खेले । त्यसपछि क्लासेनले ३१ बलमा २ चौका र ७ छक्कासहित ६७ रनको विष्फोटक पारी खेलेका थिए । ओपनर अभिषेक शर्मा ३४ रनमा आउट भए । तल्लोक्रममा एडेन माक्ररमले ३२ रन बनाए । बेंगलुरुका लोकी फर्गुसनले २ र रिस टोप्लीले १ विकेट लिए ।
यस खेलमा विभिन्न कीर्तिमानहरु बनेका छन् । सोमबार हैदराबाद र बैंगलुरुले चिन्नस्वामी रंगशालामा बनाएको कूल रन ५४९ रहेको छ । कुनै पनि टी–२० खेलमा बनेको यो सबैभन्दा धेरै रन हो । यसअघि हैदराबादमा हैदराबाद र मुम्बईको खेलमा ५ सय २३ रन बनेको थियो । हैदराबादका ब्याटरले बैंगलुरुविरुद्ध हिर्काएको २२ छक्काको सङ्ख्याले पनि कीर्तिमान बनाएको छ ।
Photo by Ron Gaunt / Sportzpics for IPL
कुनै पनि आईपीएलको इनिङ्समा प्रहार गरिएको यो सबैभन्दा धेरै छक्का हो । बैंगलुरुले हैदराबादविरुद्ध बनाएको ७ विकेटको क्षतिमा २६२ रन कुनै पनि टोलीले टी–२० खेलमा हार्दा बनाएको सबैभन्दा उच्च स्कोर हो । ट्राभिस हेडलाई शतक बनाउन ३९ बल मात्रै लागेको थियो । यो आईपीएलको इतिहासमा चौथो चाँडो शतक थियो ।
आईपीएलमा हैदराबाद एक पटकभन्दा बढी २५० प्लस रन बनाउने पहिलो टोली बन्यो । लगत्तै बैंगलुरु पनि दोस्रो टोली बनेको छ । सोमबार बैंगलुरुमा भएका ५० वा सोभन्दा बढी रनका ७ साझेदारी बने । यसअघि कुनै पनि टी–२० खेलमा ५ वटाभन्दा बढी यस्तो साझेदारी भएको थिएन । जितसँगै चौथो स्थानमा रहेको हैदराबादको ६ खेलबाट ८ अङ्क रहेको छ ।
हैदराबाद चौथो स्थानमा उक्लिएको छ भने एक खेल बढी खेलेको बेङ्गलुरु २ अङ्कका साथ अन्तिम १० स्थानमा छ । आईपीएल क्रिकेटमा आज राति पौने ८ बजे कोलकता नाइट राइडर्स र राजस्थान रोयल्स खेल्दैछन् । खेल कोलकत्ताको इडेन गार्डेनमा हुनेछ ।
