१९ वैशाख , काठमाण्डौ ।
इलाम २ को प्रतिनिधिसभा उपनिर्वाचनमा जितको दाबी गर्ने उम्मेदवार मध्येका एक हुन् राष्ट्रिय स्वतन्त्र पार्टीका उम्मेदवार मिलन लिम्बू । तर उनले एमालेका सुहाङ नेम्वाङसँग चुनाव मात्रै हारेनन् जमानत समेत जोगाउन सकेनन् । मिलन र उनले चुनावको मुखमा प्रवेश गरेको राष्ट्रिय स्वतन्त्र पार्टीका लागि यो नतिजा अनपेक्षित थियो। तर दुवैले यसलाई स्वीकारेका छन् ।
रास्वपाले यसको समीक्षामा जुटेको छ । मिलन भने आफूले चुनावमा जनाएको प्रतिवद्धता वमोजिम नै कृषि कर्ममा लाग्ने घोषणा गरेका छन् । लिम्बुले अब साग पसल खोल्ने बताएका छन्। बुधबार बिहान सामाजिक सञ्जालमार्फत आफूले निर्वाचनअगाडि पत्रकारसँग भनेको कुरा स्मरण गर्दै साग बेचेरै भए पनि जनताको सेवा गर्ने प्रतिबद्धता प्रकट गरेका हुन्।
‘निर्वाचनअगाडि पत्रकार साथीहरूले प्रश्न गर्ने गर्नुहुन्थ्यो– पत्रकारिता छोडेर राजनीतिमा आउनुभयो। निर्वाचनमा सहभागी हुनुभएको छ, जित्नुभयो भने त सांसद बन्नुहुन्छ, हार्नु भयो भने के गर्नु हुन्छ? मेरो जवाफ हुन्थ्यो– सांसद भए सदनमा जनताको आवाज उठाउने छु। नभए साग बेचेरै भए पनि जनताको सेवा गर्छु’, लिम्बुले लेखेका छन्, ‘आज पनि भन्छु– साग बेचेरै भए पनि जनताको सेवा गर्छु।’
अब आफू छिट्टै साग पसल खोल्ने तयारीमा लागेको उनको भनाइ छ। ‘हामी इलामेली युवा मिलेर छिट्टै नै साग पसल अर्थात् कृषिजन्य उत्पादनको बजारीकरणका लागि काम गर्दै छौँ। यसका आधारभूत कामहरू सुरु भइसकेका छन्। किसानबाट संकलन गर्न सकिने कृषिजन्य उत्पादनको सूची तयार भएको छ। यसका सम्भावित बजारबारे अध्ययन भएको छ’, उनले भनेका छन्, ‘हामी छिट्टै नै उत्पादन, संकलन र बजारीकरणको अवस्थामा पुग्ने छौँ। छिट्टै नै हाम्रो साग पसल देख्न पाउनुहुने छ।’
उनले लेखेका छन्, प्रतिनिधिसभा सदस्यका लागि चुनावी मैदानमा रहेका एउटा उम्मेदवारले ’साग बेचेरै भए पनि जनताको सेवा गर्छु’ भन्दै गर्दा धेरैलाई अनौठो लाग्यो। जसलाई अनौठो लाग्यो उसलाई श्रम र हाम्रा (इलाम)का सम्भावनाहरू थाहै छैन। जसलाई, श्रम गरेर होइन, अनैतिक आर्जनबाट जीवन धान्न बानी परेको छ। त्यसैले यो विषयलाई ‘ट्रोल’ बनाउने कोसिस भयो। त्यसमा भन्नु केही छैन। इलाम कृषिजन्य उत्पादनको दृष्टिले प्रचुर सम्भावना भएको जिल्ला हो। तर, यहाँको कृषिजन्य उत्पादनले उचित बजार पाएको छैन।
उत्पादन बढाउँदै बजारसम्म पु¥याएर कृषकको जीवनस्तर उकास्न थोरै भए पनि योगदान गर्नु छ। यो योजना अनुरूप मैले साग बेचेरै भए पनि जनताको सेवा गर्छु भनेको हुँ। उनले साग बेचेर के हुन्छ? भन्ने विषय पनि लेखेका छन्, हाम्रो क्षमताले भ्याएसम्म कृषकको उत्पादनलाई बजारसम्म पु¥याउँदा कृषकको जीवनस्तर उकास्न सहयोग पुग्ने छ । त्यसपछि, सोही व्यवसायबाट हामी युवा पनि आत्मनिर्भर हुने छौँ ।
राजनीति पेसा होइन। राजनीतिलाई पेसा बनाउनु हुँदैन। म राजनीतिलाई पेसा बनाउने गलत प्रवृत्तिको पक्षमा छैन । त्यस कारण राजनीति मेरा लागि सेवा हुने छ, जीवन धान्न कृषिजन्य उत्पादन र बजारीकरण मेरो पेसा हुने छ । यसै कर्मबाट नै इलामेली जनताको सेवा गर्ने छु। भन्दै आएको थिए– म अकबरे उम्मेदवार हुँ, म अलैँची उम्मेदवार हुँ म अम्लिसो उम्मेदवार हुँ ,म ओलन उम्मेदवार हुँ अर्थात् इलामका कृषक र कृषि उत्पादनको उम्मेदवार हुँ।
र, आज पनि भन्छु– साग बेचेरै भए पनि जनताको सेवा गर्छु। उपनिर्वाचनमा विजयी सुहाङले २७ हजार ७७२ भोट प्राप्त गरे भने उनका निकटतम प्रतिस्पर्धी कांग्रेसका खड्काले २१ हजार ९४२ मत मात्र प्राप्त गरे । यस्तै पहिचानवादी उम्मेदवार डकिन्द्र थेगिम ११ हजार ४५७ भोट ल्याएर तेस्रो हुँदा चौथो स्थानमा रहेका मिलनले ५ हजार ५० भोट प्राप्त गरे ।
