२२ जेठ, एजेन्सी ।
अमेरिका र वेस्टइन्डिजमा जारी आइसीसी टी–२० विश्वकप अन्तर्गत आज तीन खेल हुँदैछन् । जसमध्ये पहिलो खेल समूह सी अन्तर्गत अफगानिस्तान र युगान्डाबीच गुयानास्थित प्रोभीडेन्स स्टेडियममा बिहान सकिएको छ । आफ्नो पहिलो खेलमा युगान्डाविरुद्ध १२५ रनको सानदार जित निकाल्दै अफगानिस्तानले विजयी सुरुआत गरेको छ ।
अफगानिस्तानले दिएको १८४ रनको विशाल लक्ष्य पछ्याएको युगान्डा १६ ओभरमा मात्रै ५८ रन बनाएर अलआउट भएको थियो । त्यस्तै आज दोस्रो खेल समुह बी अन्तर्गतको इङल्याण्ड र स्कटल्याण्डबीच हुँदैछ । बार्बाडोसस्थित केन्सिंगटन ओभलमा हुने यो खेल नेपाली समय अनुसार राति ८ः१५ बजेदेखि शुरु हुने छ । त्यस्तै आज तेस्रो खेल समूह डी अन्तर्गत नेपाल र नेदरल्याण्डसबीच हुने छ ।
डल्लासस्थित ग्राण्ड पेरी स्टेडियममा हुने यो खेल नेपाली समय अनुसार राति ९ः१५ बजेदेखि शुरु हुने छ ।आइसिसी टी–२० विश्वकप क्रिकेटमा १० वर्षपछि पुनरागमन गरेको नेपालले आज नेदरल्याण्ड्ससँग खेल्दैछ । नेपालले यसअघि सन् २०१४ मा पहिलोपटक टी–२० विश्वकप खेलेको थियो ।
काठमाडौँमा गत कात्तिकमा मूलपानीस्थित माथिल्लो मूलपानी क्रिकेट मैदानमा भएको एसिया छनोट खेलमा नेपालले संयुक्त अरब इरिरेट्स (युएई)लाई सेमिफाइनलमा पराजित गर्दै विश्वकपमा स्थान पक्का गरेको थियो । नेपालले दोस्रोपटक टी–२० विश्वकपमा सहभागिता जनाउँदा नेदरल्याण्ड्स भने पाँचौँपटक सहभागिता जनाउँदैछ । नेपाल र नेदरल्याण्ड्स दुवै चिरपरिचित प्रतिद्वन्द्वी हुन् । तीन महिनाअघि नेपालमा नै भएको त्रिदेशीय टी–२० शृङ्खलामा नेदरल्याण्ड्सले दुई खेल जित्दा नेपालले एक खेलमा जित हासिल गरेको थियो ।
विश्वकपअन्तर्गत अमेरिकाको डालासस्थित ग्राण्ड प्रेरी रङ्गशालामा आज राति हुने उक्त खेलमा नेपालले विजयी लक्ष्य हासिल गर्ने उद्देश्यका साथ मैदानमा उत्रँदैछ । त्यसो त नेदरल्याण्ड्स पनि आफ्नो पहिलो खेलमा जित हासिल गर्दै आगामी यात्रालाई सहज बनाउने कोसिसमा रहनेछ ।
नेपाली राष्ट्रिय टोलीका मुख्य प्रशिक्षक मोन्टी देशाईले नेदरल्याण्ड्सविरुद्धको खेलका लागि आफ्नो टोली तयारी अवस्थामा रहेकाले प्रतियोगितामा उत्कृष्ट प्रदर्शन गर्ने विश्वास व्यक्त गरे । उनले अमेरिकाको हावापानी र त्यहाँको अवस्थासँग भिज्ने राम्रो असवर पाएको जनाउँदै पहिलो खेलका लागि आफ्नो टोली तयारी अवस्थामा रहेको बताए ।
नेपाली टोलीले करिब एक महिनासम्म अमेरिकामा अभ्यास गरेको थियो । त्यसैगरी यस विश्वकप क्रिकेट प्रतियोगितामा सवैभन्दा कम उमेरमा कप्तानीको भूमिका निर्वाह गरेका २१ वर्षीय नेपाली राष्ट्रिय टोलीका कप्तान रोहितकुमार पौडेलले नेदरल्याण्ड्सविरुद्धको खेलमा उत्कृष्ट क्रिकेट खेलेर देश र नेपाली फ्यानलाई गर्व गर्न सक्ने वातावरण तय गर्ने विश्वास व्यक्त गरे ।
उनले नेपालले जितको लक्ष्यसहित खेल्ने बताएका छन् । यसैगरी यसपटकको विश्वकपमा नेपालका अर्का खेलाडी गुलशन झा सबैभन्दा कम उमेरमा विश्वकप खेल्ने खेलाडीको कीर्तिमानी बनाउने भएका छन् । उनी मात्र १८ वर्षका छन् ।अमेरिका र वेस्टइन्डिजमा चालु टी–२० विश्वकप क्रिकेटका विजेता टोलीले २४ लाख ५० हजार अमेरिकी डलर पुरस्कार पाउँदा उपविजेताले १२ लाख २८ हजार डलर पाउनेछन् ।
त्यस्तै विश्वकपमा सेमिफाइनलमा पुग्ने दुई टोलीले जनही सात लाख ८७ हजार डलर पाउनेछन् भने प्रतियोगितामा सहभागी सबै टोलीले २ लाख २५ हजार अमेरिकी डलर पाउनेछन् । विश्वकपमा नेपाल र नेदरल्यान्ड समूह ‘डी’मा रहेका छन् । नेपालको समूहमा टेस्ट मान्यता प्राप्त राष्ट्र दक्षिण अफ्रिका, श्रीलङ्का र बङ्गलादेश छन् । नेपाल र नेदरल्याण्ड्सबीचको खेल नेपाली समयानुसार आज राति ९ः१५ बजे हुनेछ ।
त्यस्तै समूह ‘डी’मा नै रहेको दक्षिण अफ्रिकाले श्रीलङ्कालाई छ विकेटले पराजित गर्दै प्रतियोगितामा सुखद सुरुआत गरिसकेको छ ।यस्तै आज साबिक विजेता इङ्गल्यान्डले तुलनात्मक रुपमा कमजोर प्रतिद्वन्द्वी स्कटल्यान्डको सामना गर्दैछ । खेल बार्बाडसको ब्रिजटाउनस्थित केनसिङ्टन ओभल रङ्गशालामा राति २०ः१५ बजे सुरु हुनेछ । जारी विश्वकपमा खेल्न लागिएको छैटौँ खेल हो ।
इङ्गल्यान्ड र स्कटल्यान्ड प्रतियोगिताको समूह ‘बी’ मा छन् । यो समूहमा यसअघि ओमान र नामिबियाबिच खेल भइसकेको छ । उक्त खेलमा नामिबियाले ओमानलाई ‘सुपर ओभर’ मा हराएको थियो । अस्ट्रेलिया पनि सोही समूहमा छ । अन्तर्राष्ट्रिय क्रिकेट काउन्सिल (आईसीसी)द्वारा जारी पछिल्लो टी–२० अन्तर्राष्ट्रिय वरीयतामा इङ्गल्यान्ड तेस्रो स्थानमा आसिन छ । स्कटल्यान्ड भने पछिल्लो आईसीसी वरीयताको १४औँ स्थानमा छ । विश्व क्रिकेटमा धेरै कारणले यी दुवै फरक चरित्र बोकेका टोली हुन् ।
इङ्गल्यान्डले सन् २००७ मा सम्पन्न पहिलो संस्करणदेखि नै टी–२० विश्वकपमा सहभागिता जनाउँदै आएको छ । इङ्गल्यान्डको यो लगातार नवौँ सहभागिता हो । स्कटल्यान्डको भने टी–२० विश्वकपमा यो छैटौँ सहभागिता हो । विश्वकपको पहिलो संस्करणमा पनि स्कटल्यान्ड सहभागी थियो । यसैगरी क्रिकेटको जननी राष्ट्र मानिने इङ्गल्यान्डले हालसम्म दुईपटक टी–२० विश्वकपको उपाधि चुमिसकेको छ ।
इङ्गल्यान्ड टी–२० विश्वकपको साबिक विजेता पनि हो । सन् २०२२ मा सम्पन्न आठौँ संस्करणको फाइनलमा इङ्गल्यान्डले पाकिस्तानलाई पाँच विकेटले हराएको थियो । इङ्गल्यान्डका अतिरिक्त वेस्ट इन्डिजले मात्र हालसम्म दुईपटक टी–२० विश्वकपको उपाधि उचाल्न सकेको छ ।
अर्कोतिर, स्कटल्यान्ड टी–२० विश्वकपको ‘सुपर–१२’ चरणभन्दा अगाडि बढ्न सकेको छैन । सन् २०२१ मा सम्पन्न विश्वकपमा स्कटल्यान्ड ‘सुपर–१२’ चरणमा पुगेको थियो । ‘सुपर–१२’ चरणमा भने स्कटल्यान्ड आफूले खेलेको पाँचवटै खेलमा पराजित भएको थियो । टी–२० विश्वकपमा इङ्गल्यान्डले हालसम्म कुल ४४ खेल खेलिसकेको छ । त्यसमध्ये इङ्गल्यान्ड २४ खेलमा विजयी र १९ खेलमा पराजित भएको छ ।
एक खेल भने अनिर्णीत रुपमा सकिएको छ । स्कटल्यान्डले भने विश्वकपमा हालसम्म १८ खेल खेलेको छ । स्कटल्यान्ड त्यसमध्ये पाँच खेलमा विजयी र १२ खेलमा पराजित भएको छ । स्कटल्यान्डको एक खेल भने अनिर्णीत रुपमा सकिएको छ ।इतिहास र तथ्याङ्कमा स्कटल्यान्डभन्दा इङ्गल्यान्ड निकै बलियो देखिन्छ । त्यसैले साबिक विजेता इङ्गल्यान्ड मंगलबारको खेलमा स्कटल्यान्डलाई हराउँदै नवौँ संस्करणमा सुखद सुरुआत गर्न चाहन्छ ।
तर, इङ्गल्यान्डको यो अभियानमा वर्षा बाधक बन्न सक्ने सम्भावना देखिन्छ । जल तथा मौसम विज्ञान विभागका अनुसार, मंगलबार बार्बाडसमा ७० प्रतिशत वर्षाको सम्भावना रहेको छ । टी–२० अन्तर्राष्ट्रिय क्रिकेटमा हालसम्म इङ्गल्यान्ड र स्कटल्यान्डबिच एक खेल पनि खेलिएको छैन । त्यसैले यी दुई टोलीबिच पहिलो पटक भिडन्त हुन लागेको हो ।
यस्तै आज विहान भएको खेलमा समूह डीमा रहेको दक्षिण अफ्रिकाले विजयी सुरुवात गरेको छ । न्यूयोर्कमा भएको खेलमा दक्षिण अफ्रिकाले श्रीलंका माथि ६ विकेटको जित दर्ता गर्दै सुखद सुरुवात गरेको हो । ब्याटिङका लागि केही असहज रहेको पिचमा खेलाईएको खेलमा श्रीलंकाले दिएको ७८ रनको झिनो लक्ष्य दक्षिण अफ्रिकाले १६.२ ओभरमा ४ विकेट गुमाएर भेटायो ।
जितमा दक्षिण अफ्रिकाका लागि क्विन्टन डीककले २० रन बनाए । यस्तै हेनरीक क्लासेन १९ रनमा अविजित रहे । श्रीलंकाका लागि वानिन्दु हसरंगाले २ तथा दसुन शनाका र नुवान थुसराले १–१ विकेट लिए । त्यसअघि टस जितेर ब्याटिङ रोजेको श्रीलंका १९.१ ओभरमा ७७ रनमा समेटिएको थियो । कुशल मेण्डिसले सर्वाधिक १९ रन बनाए । एन्जेलो म्याथ्युजले १६ तथा कामिन्दु मेण्डिसले १६ रन जोडे । दक्षिण अफ्रिकाका एनरिक नोर्टजे एक्लैले ४ विकेट लिए ।
सोमबरराती भएको खेलमा समूह ‘सी’मा रहेको अफगानिस्तानले विजयी सुरुआत गरेको छ । आफ्नो पहिलो खेलमा युगान्डाविरुद्ध १२५ रनको सानदार जित निकाल्दै अफगानिस्तानले विजयी सुरुआत गरेको हो । अफगानिस्तानले दिएको १८४ रनको विशाल लक्ष्य पछ्याएको युगान्डा १६ ओभरमा मात्रै ५८ रन बनाएर अलआउट भयो । युगान्डाका रोबिन्सन ओबुयाले १४ र रिआजत अली साहले ११ रन बनाउनुबाहेक कुनै पनि ब्याटरले खुलेर खेल्न सकेनन् ।
युगान्डालाई सस्तैमा समेट्ने क्रममा अफगानिस्तानका फजलहक फारुकी एक्लैले ५ विकेट लिए । यसअघि प्रोभिडेन्समा टस हारेर पहिले ब्याटिङ गरेको अफगानिस्तानले ५ विकेटको क्षतिमा १८३ रन बनाएको थियो । ओपनरद्वय गुर्बाजले ७६ र इब्राहिमले ७० रन बनाए । युगान्डाका ब्रायन मसाबा र कस्मस क्येवुटाले २÷२ र अलेपेश रमजानीले एक विकेट लिए ।
