३० असार ,एजेन्सी ।
कोपा अमेरिका फुटबलमा तेस्रो स्थानका लागि भएको खेलमा उरुग्वे विजयी भएको छ ।आज बिहान भएको खेलमा क्यानडालाई पेनाल्टी सुटआउटमा ४–३ गोलले हराउँदै उरुग्वे तेस्रो भएको हो । ब्याङक अफ अमेरिका स्टेडियममा भएको खेल निर्धारित ९० मिनेट २–२ गोलको बराबरी भएपछि पेनाल्टीमा पुगेको थियो ।
क्यानडाका इस्माइल कोन र जोनाथन डेभिड तथा उरुग्वेका रोड्रिगो बेन्टाङ्कर र लुइस सुवारेजले समान एक गोल गरेपछि बराबरी भयो । तर पेनाल्टीमा क्यानडा पराजित भयो । क्यानडा बुधवार भएको पहिलो सेमिफाइनलमा साविक विजेता अर्जेन्टिनासँग २–० गोलले र उरुग्वे बिहीवार भएको दोस्रो सेमिफाइनलमा कोलम्बियासँग १–० ले पराजित भएको थियो । अब उपाधिका लागि भोलि बिहान अर्जेन्टिना र कोलम्बिया खेल्नेछन् ।
यता युरोकपमा आज राती उपाधिका लागि इंग्ल्याण्ड र स्पेन भिड्दैछन् । युरोको अघिल्लो संस्करणको फाइनलमा इटालीसँग टाइब्रेकरमा पराजित हुँदा इंग्ल्यान्ड उपाधि जित्नबाट चुकेको थियो । इंग्ल्यान्ड १९६६ यता चलेको उपाधिको खडेरी तोड्न चाहन्छ । प्रशिक्षक ग्यारेथ साउथगेट नियुक्त भएयता विश्वकप र युरोमा राम्रो प्रदर्शन गरेको इंग्ल्यान्ड पुनः एकपटक उपाधि नजिक पुगेको छ ।
विश्व फुटबलमा उत्कृष्ट मध्यका एक फरवार्ड ह्यारी केन पनि आफ्नो करिअरको पहिलो उपाधि जित्ने संघारमा छन् । राष्ट्रिय टोली र क्लब फुटबलमा थुप्रै व्यक्तिगत अवार्ड हासिल गरेका केनले हालसम्म टिमका लागि भने कुनै उपाधि जित्न सकेका छैनन् । आइतबार स्पेनविरुद्ध युरो २०२४ को फाइनल केनका लागि सुवर्ण अवसर हुनेछ । केनका लागि व्यक्तिगत रुपमा यो पहिलो उपाधि हुने हुँदा विशेष रहनेछ । जारी प्रतियोगितामा ३ गोलसहित सर्वाधिक गोलकर्ताको होडमा समेत रहेका उनी टोलीलाई च्याम्पियन बनाउन चाहन्छन् ।
फाइनलको अघिल्लो दिन पत्रकार सम्मेलनमा उनले टोली तयार रहेको अभिव्यक्ति दिए । विपक्षी टोलीको कुन खेलाडी खतरा बन्न सक्छ भन्ने प्रश्नमा केनले पूरा टोली नै राम्रो रहेको बताए । ‘कुनै व्यक्ति भन्दापनि स्पेन आफैंमा राम्रो टोली छ । हो दुवै विंगर, मोराटा र ओल्मोले राम्रो खेलेका छन् तर उनीहरुको डिफेन्स पनि राम्रो छ । उनीहरु राम्रो टोली भएकै कारण फाइनलमा छन् ।’
केनले भनेजस्तै स्पेन उ त्कृष्ट लयमा पनि छ । टिममा लामिन यमल जस्ता किशोरले सनसनी मच्चाइरहेका छन् । स्पेनले आफ्नो यात्रामा डिफेन्डिङ च्याम्पियन इटाली, आयोजक जर्मनी र उपाधिको बलियो दाबेदार फ्रान्सको चुनौती काटेको छ । तर यता जुड बेलिङ्घम र ह्यारी केनसम्मिलित इंग्ल्यान्डले पनि कम्तीको छैन । स्पेन र इंग्ल्यान्ड सन् १९९६ पछि पहिलो पटक विश्वकप वा युरोमा भिड्दै छन ।
इतिहास पल्टाउने हो भने सन् १९२९ मा दुई टोलीबीच पहिलो खेल भएको थियो । त्यसयता अहिलेसम्म २७ खेल भएको छ । त्यसमध्ये पछिल्लो प्रदर्शनमा स्पेन सुदृढ छ । तर, समग्रमा भने इङ्ल्यान्ड नै अगाडि छ । अहिलेसम्मका खेलमा इङ्ल्यान्ड १४ पटक विजयी छ भने स्पेनको पक्षमा १० जित रहेको छ । अन्य तीन खेल भने बराबरीमा टुंगिएको छ । पछिल्ला ९ खेलमध्ये स्पेन ५ पटक विजयी छ ।
सन् १९६० देखि १९८० बीच त्यस्तो समय थियो, जतिबेला इङ्ल्यान्डले स्पेनविरुद्ध लगातार ७ खेल जितेको थियो । तर, सबैभन्दा महत्त्वपूर्ण तथ्य भने इङ्ल्यान्डको पक्षमा छ । त्यो के भने युरोमा स्पेनले अहिलेसम्म इङ्ल्यान्डलाई हराउन सकेको छैन । साउथगेटको नेतृत्वमा इंग्ल्यान्डले खेलेका प्रतियोगितामा टिम अन्त्यसम्म पुगेता पनि यही तथ्य स्पेनमा भने लागू हुन्न । एक दशकअगाडि विश्व फुटबलमा राज गरेको स्पेन त्यसपछि ओरालो लागेको थियो ।
ला रोजाले सन् २००८ र २०१२ मा युरो जितेको थियो भने त्यसबीच सन् २०१० को विश्वकप । तर, त्यसपछि स्पेनले केही जित्न सकेन र ठूला प्रतियोगितामा टोलीको प्रदर्शन खस्कादो थियो । प्रशिक्षक लुइस डे ला फुन्टे आएपछि भने स्पेनले सम्हालिएर खेल्न थालेको छ । यसैक्रममा गत वर्ष यूईएफए नेसन्स लिग जितेको थियो । स्पेन अहिलेको प्रतियोगितामा लगातार सबै खेल जित्ने एक्लो टिम रहेको छ ।
फाइनलसम्मको यात्रामा स्पेनले जर्मनी र फ्रान्सको हातबाट बलियो चुनौती सामना गर्नुपरेको थियो । यसै क्रममा स्पेनले १३ गोल गरेको छ र यो इंग्ल्यान्डले गरेको ७ गोलको तुलनामा धेरै राम्रो हो । फाइनललाई लिएर डानी ओल्मो भन्छन्, ‘इंग्ल्यान्डले यो प्रतियोगितामा देखाएको छ कि यो टिम पुनरागमन रच्न सक्षम छ ।
हारको स्थितिबाट यो टिमले खेल जितेको छ । इंग्ल्यान्डले कहिले पनि हार मान्दैन ।’ त्यसैले फाइनलमा कडा प्रतिस्पर्धा हुने निश्चित छ । फाइनल नेपाली समयअनुसार आइतबार मध्यरात १२ः४५ बजे सुरु हुनेछ । खेल बर्लिनस्थित ओलम्पिक रंगशालामा हुनेछ ।
