३१ साउन, विराटनगर ।
आइतबारदेखि सुरु हुने साफ यु–२० च्याम्पियनसिप फुटबल सातदोबाटोस्थित एन्फा कम्प्लेक्समा हुने भएको छ ।
नेपालको एकमात्र अन्तर्राष्ट्रियस्तरको दशरथ रंगशालाको अवस्था नाजुक भएपछि च्याम्पियनसिप त्यहाँ सारिएको अखिल नेपाल फुटबल संघ (एन्फा) ले जनाएको छ ।
बिहीबार पत्रकार सम्मेलनको आयोजना गरी एन्फाका प्रवक्ता सुरेश शाहले दशरथ रंगशाला खेल्न नमिल्नेगरी बिग्रिएकोले च्याम्पियनसिप एन्फा मैदान सातदोबाटो सारिएको बताए ।
अगस्ट १८ देखि २८ सम्म हुने च्याम्पियनसिपका खेलहरू एन्फा मुख्यालयको एस्टो टर्फमा खेलाउन लागिएको उनको भनाइ छ ।
हिलाम्मे मैदान र खेलाडीको विजोग अवस्थाबारे सर्वत्र आलोचना भएको थियो दशरथ रंगशालाको अवस्था देखेपछि दक्षिण एसियाली फुटबल महासंघ (साफ) ले एन्फालाई मैदानको विकल्प खोज्न अग्रहसमेत गरेको थियो ।
मैदान अभावका कारण यस च्याम्पियनसिप एन्फाको टर्फमै खेलाउने र फाइनल खेल दशरथ रंगशाला हुने प्रवक्ता शाहको भनाइ छ ।
च्याम्पियनसिपका भाग लिन माल्दिभ्स टोली बिहीबार नै नेपाल आइपुगेको छ । अन्य टोली शनिबारसम्म आई पुग्नेछन् ।
साफ यु-२० च्यापिम्यनसिपमा ६ देशको सहभागिता रहनेछ । सहभागी टोलीलाई दुई समूहमा विभाजन गरिएको छ । समूह ‘ए’ मा नेपालसहित बंगलादेश र श्रीलंका रहेको छ ।
समूह ‘बी’ बाट भारत, माल्दिभ्स र भुटान रहेका छन् । उद्घाटन खेलमा नेपाल र श्रीलंकाले प्रतिस्पर्धा गर्नेछन् । च्याम्पियनसिपका लागि एन्फाले नेपाली खेलाडी टोलीको घोषणा समेत गरिसकेको छ ।
नेपाली टोली :
जियारथ शेख, कृषल मोक्तान (गोलरक्षक), विशाल केसी, सीमान्त थापा, अश्विन घोरा, सैनीविक्रम तामाङ, आयुष तिम्सिना, मदन पौडेल, राम थापा, समिन घिमिरे, सरोज दर्लामी, निन्साङ लिम्बु, कुशल देउवा, अविनाश स्याङ्तान, जनप्रकाश बम, लचु थापा, नीरज कार्की, हरिश राज भट्ट, धर्बेन्द्र कुँवर, अनिल बम्जन, समीर तामाङ, नीराजन धामी र रोहन खड्गी ।
