१२ भदौ , काठमाण्डौ ।
नेकपा एकीकृत समाजवादीका पदाधिकारीको निर्वाचन परिणाम अनुशार चर्चित नेतृ रामकुमारी झाक्री पराजित भएकी छन् । नेकपा (एकीकृत समाजवादी) को महिला उपाध्यक्षमा जयन्तीदेवी राई विजयी भएकी छन् ।
उनीसँग नेकपा एसकी चर्चित नेतृ रामकुमारी झाँक्री पराजित भएकी छन् । राईले १९९ मत ल्याउँदा झाँक्रीले ११२ मत मात्र प्राप्त गरेकी छिन् । यसअघि झाँक्रीलाई सचिवको जिम्मेवारी दिइएको थियो ।
झाक्री सहमति नभए तत्काल निर्वाचन प्रक्रियामा जाने पक्षमा थिइन् । झाक्री गएको प्रतिनिधिसभा निर्वाचनमा पनि पराजित भएकी थिइन् ।
तत्कालीन नेपाली काग्रेस र माओवादीसहितको गठबन्धनबाट उम्मेदवार बनेकी झाक्री गुल्मी क्षेत्र नम्बर २ मा एमालेका गोकर्ण विष्टसँग पराजित भएकी थिइन ।
झाक्रीलाई दुई हजार ३४ मतले पछि पार्दै विष्ट विजयी भएका थिए । प्रतिनिधि सभा निर्वाचनमा गुल्मेली मतदाता नपत्याएका झाक्रीलाई उनकै पार्टीका कार्यकर्ताले समेत निर्वाचित गराउन सकेनन् ।
नेकपा एसमा केन्द्रीय समिति सदस्यमध्येबाट पदाधिकारीका लागि चुनाव भएको हो । वरिष्ठ उपाध्यक्षमा राजेन्द्र पाण्डे निर्विरोध भएका छन् ।
यसअघि नै माधव नेपाल अध्यक्ष, झलनाथ खनाल सम्मानित नेता र घनश्याम भूसाल महासचिव चयन भइसकेका थिए । अन्य पदाधिकारी चयनका लागि भने मंगलबार मतदान भएको हो ।
त्यस्तै उपाध्यक्ष (मधेशी) मा रामचन्द्र झालाई पराजित गर्दै धर्मनाथ प्रसाद साह विजयी भएका छन् । खुला उपाध्यक्षमा डा. गंगालाल तुलाधर, जगन्नाथ खतिवडा, भानुभक्त जोशी र प्रकाश ज्वाला विजयी भएका छन् ।
त्यस्तै उपमहासचिवमा गरिमा शाह, राजेन्द्र राई, मेटमणि चौधरी र रामकुमार भट्टराई निर्वाचित भएका छन् ।
त्यस्तै सचिवमा गणेश बिक, बलदेव चौधरी, श्रीनाथ बराल, सावित्रा भुषाल, शेरबहादुर कुँवर, सोमप्रसाद पाण्डे र चन्द्रबहादुर शाही निर्वाचित भएका छन् ।
महाधिवेशन सकिएको झण्डै दुई महिनापछि एकीकृत समाजवादीले पदाधिकारी चयन गरेको हो ।
केन्द्रीय कमिटी र सचिवालयमा सहमति नजुटेपछि मनोनित केन्द्रीय कमिटीका सदस्यबाट पदाधिकारी चयनका लागि निर्वाचन गरिएको थियो ।
एमालेबाट विभाजन भइ गठन भएको तीन वर्षपछि एकीकृत समाजवादीमा गुटबन्दी छरपष्ट हुने गरी प्यानल निर्वाचन भएको हो ।
गत महाधिवेशनमा अन्तिम समयमा सम्मानित नेता झलनाथ खनालले साथ छाडेपछि अध्यक्षको आकांक्षा छाडेर महासचिव स्वीकारेका घनश्याम भुसालले सम्मानजनक प्रतिनिधित्व मागेका थिए ।
तर, सहमति नजुटेपछि भएको निर्वाचनमा अध्यक्ष माधव नेपाल र भुसाल समूहका आ–आफ्नै प्यानल थिए ।
अध्यक्ष नेपालको सचिवालयबाट स्वकीय सचिव मोहन गौतम र लक्ष्मण केसीले भिन्दाभिन्दै लिस्ट वितरण गर्दा संस्थापन पक्षका केही नेता पराजित भएका छन् ।
ती दुई लिस्टका कारण पदाधिकारीमा भुसाल समूहका पाँच नेता विजयी भएका छन् । नेतृ रामकुमारी झाँक्री नेपाल समूहका फरक लिस्टकै कारण पराजित भइन् ।
भुसाल समूहबाट महिला उपाध्यक्षमा जयन्ती राई, मधेशी उपाध्यक्षमा धर्मनाथप्रसाद साह, प्रकाश ज्वाला र भानुभक्त जोशी निर्वाचित भएका हुन् । त्यस्तै, सचिवमा बलदेव चौधरी निर्वाचित भएका छन् ।
