२० भदौ , एजेन्सी ।
राहुल द्रविड राजस्थान रोयल्समा फर्किने भएका छन् । भारतीय क्रिकेट टोलीका पूर्व मुख्य प्रशिक्षक राहुलले २०२५ को आइपिएल सिजनअघि राजस्थान रोयल्समा मुख्य प्रशिक्षकका रुपमा पुनरागमन गर्ने भएका हुन् । यसका लागि द्रविड र राजस्थानको टोलीले सम्झौतामा हस्ताक्षर गरेका छन् । द्रविडले आईपिएल सन् २०१२ र २०१३ मा कप्तान थिए ।
द्रविड २०१४ र २०१५ सिजनमा टिम निर्देशक र मेन्टरको रूपमा काम गरेका थिए । २०२१ मा उनी भारतीय पुरुष टोलीको मुख्य प्रशिक्षक नियुक्त भएका थिए । उनले गत जुनमा भारतलाई ११ वर्ष पछि पहिलो पटक आइसिसी उपाधि जिताएर आफ्नो कार्यकाल समाप्त गरेका थिए । राजस्थानले भारतका पूर्व ब्याट्सम्यान विक्रम राठौरलाई सहायक प्रशिक्षकको रूपमा पनि अनुबन्ध गर्ने सम्भावना रहेको छ ।
भारतका पूर्व चयनकर्ता राठौर सन् २०१९ मा भारतको ब्याटिङ प्रशिक्षक बन्नुअघि एनसीएमा द्रविडको कोचिङ स्टाफमा थिए । आपिएलमा द्रविडले राजस्थान रोयल्सको जिम्मेवारी सम्हाल्ने छन् । सन् २०२१ देखि क्रिकेट निर्देशक रहेका कुमार संगाकाराले आफ्नो फ्रेन्चाइजलाई निरन्तरता दिँदै अन्य लिग(एसए २० मा पार्ल रोयल्स र सिपिएलमा बार्बाडोस रोयल्स) मा आफ्नो टोलीको रेखदेख गर्नेछन् ।
२००८ को पहिलो सिजनयता राजस्थानले आइपिएलको उपाधि जित्न सकेको छैन । २०२२ मा गुजरात टाइटन्ससँग फाइनलमा पराजित हुदै उपविजेता बनेको थियो । राजस्थानले २०२३ मा प्लेअफमा स्थान बनाउन असफल भयो । यसै बर्ष सिजनको उत्कृष्ट सुरुवातको बावजुद लिगमा तेस्रो स्थान हासिल गरेको थियो । उता ब्रेन्डन म्याकुलम इङ्ग्ल्यान्ड क्रिकेटको तीनै फर्म्याटमा मुख्य प्रशिक्षक हुने भएका छन् ।
आगामी वर्षको जनवरी बाट सन् २०२७ को अन्त्य सम्मका लागि म्याकुलमलाई इङ्ग्ल्यान्ड क्रिकेट बोर्ड(इसिबी) ले सो जिम्मेवारी दिएको हो । टेस्ट क्रिकेटमा सन् २०२२ देखि नै मुख्य प्रशिक्षकको जिम्मेवारीमा रहेका म्याकुलमले टि ट्वान्टी र ओडिआईको नयाँ जिम्मेवारी पनि पाएका हुन् । भारत भ्रमणबाट म्याकुलमको नयाँ जिम्मेवारीको सुरुवात हुनेछ ।
अर्को बर्ष पाकिस्तानमा हुने आइसीसी च्याम्पियन्स ट्रफी मुख्य प्रशिक्षकको जिम्मेवारीमा म्याकुलमको पहिलो ठूलो प्रतियोगिता हुनेछ । जनवरीमा म्याकुलमले कार्यभार सम्हाल्नुअघिसम्म अन्तरिम रूपमा पुरुष टोलीको मुख्य प्रशिक्षकका रुपमा मार्कस ट्रेस्कोथिक रहने छन् । म्याकुलमले आफू नयाँ चुनौती स्वीकार्न उत्साहित रहेको र सबै फर्म्याटमा एउटै प्रशिक्षकले धेरै अर्थ राख्ने बताए ।
‘मैले टेस्ट टोलीसँग बिताएको समयको पूर्ण आनन्द उठाएको छु र ओडिआई र टि ट्वान्टीको पनि जिम्मेवारी पाउँदा उत्साहित छु,’ म्याकुलमले इसीबीको विज्ञप्तिमा भने ‘यो नयाँ चुनौती अँगाल्न तयार छु । जोस (बटलर) र टोलीसँग नजिकबाट काम गर्न उत्सुक छु जुन पहिले नै बलियो जगमा निर्माण भएको छ । एकीकृत कोचिंग संरचनाको विचारले विशेष गरी अर्को वर्षको खेल तालिकाहरुलाई धेरै सजिलो अर्थ बनायो’, उनले भने ।
