२२ भदौ, विराटनगर ।
आगामी दुई वर्षपछि क्यानडा, मेक्सिको र अमेरिकामा संयुक्त रूपमा हुने फिफा विश्वकपको छनोट खेलमा उरुग्वेले बराबरी खेल्दै अंक बाँडेको छ ।
शनिबार बिहान भएको खेलमा पहिलो संस्करणको विश्वकप (सन् १९५०) को विजेता उरुग्वेले पराग्वेसँग गोलरहित बराबरी खेल्दै अंक बाँडेको हो ।
उरुग्वेको कन्टेनेरियो मैदानमा भएको खेलको निर्धारित समय दुवै टोलीले गोल गर्न सकेनन् । उक्त खेल उरुग्वेका लागि स्ट्राइकर लुइस स्वारेजको अन्तिम खेल थियो । ३७ वर्षीय स्वारेजले गत सोमबारमा अन्तर्राष्ट्रिय खेलबाट सन्न्यासको घोषणा गरेका थिए ।
स्वारेजले उरुग्वेका लागि सर्वाधिक धेरै गोल गरेका छन् । उनले १४२ खेलमा ६९ गोल गरेका छन् । लिभरपुल र बार्सिलोनाका पूर्वफरवार्ड सुआरेजले केही दिनअघि अन्तर्राष्ट्रिय खेलबाट सन्न्यास घोषणा गरेका थिए ।
उनले सन् २००७ देखि उरुग्वेका लागि खेल्दै आएका थिए । उनले उरुग्वेको टोलीमा चार विश्वकप र पाँच कोपा अमेरिका प्रतियोगिताका खेलेका छन् । उनले सन् २०११ को महादेशीय प्रतियोगिताको उपाधि जितेका थिए ।
उरुग्वे विश्वकप छनोटको अंक तालिकामा दोस्रो स्थानमा छ, उसले ७ खेलबाट १४ अंक जोडेको छ । उरुग्वे यसपालि पनि विश्वकपमा छनोट हुने संघारमा छ ।
हालै सम्पन्न कोपा अमेरिकामा सेमिफाइनलमा कोलम्बियासँग हारेर अगाडि बढ्न नसकेको उरुग्वले घरेलु मैदानमा सेन्टेनारियोमा पराग्वेलाई डाकेको हो ।
