२५ भदौ , एजेन्सी ।
हमासद्वारा सञ्चालित प्रशासनले गाजा पट्टीमा इजरायलको पछिल्लो हवाई आक्रमणमा कम्तीमा ४० जनाको मृत्यु भएको जनाएको छ ।
हमासद्वारा सञ्चालित सिभिल डिफेन्स एडमिनिस्ट्रेशनले आक्रमण मानवीय सहायताका लागि तोकिएको क्षेत्रमा भएको र अन्य धेरै व्यक्ति घाइते भएको हुन सक्ने आशङ्का व्यक्त गरेको छ ।
हमासको सिभिल डिफेन्स अपरेसन निर्देशकले भने, ‘घटनामा ४० जनाको मृत्यु भएको छ भने ६० जना घाइते भएका छन् ।’
यता इजरायली सेनाले भने उसका लडाकु विमानहरूले खान युनिसमा हमास लडाकुहरूको ‘सञ्चालन केन्द्र’मा आक्रमण गरेको बताएको छ ।
यो अपरेसनमा नागरिकहरूलाई जोगाउन उपायहरू अवलम्बन गरिएको उसको दाबी छ ।
तर स्थानीय बासिन्दाहरूले अल–मवासीमा विस्थापित सर्वसाधारणहरूको टेन्टमा तीनवटा आक्रमणहरू गरिएको थियो ।
अल–मवासी खान युनिसको पश्चिममा एउटा ठूलो जनसंख्या भएको क्षेत्र हो ।
गत वर्ष अक्टोबरमा इजरायलले आफ्नो सैन्य अभियान सुरु गरेपछि हजारौँ विस्थापित प्यालेस्टिनीहरू आफ्नो ज्यान बचाउन खान युनिसतिर भागेका थिए ।
हमासद्वारा सञ्चालित स्वास्थ्य मन्त्रालयका अनुसार इजरायली सैन्य अभियानमा हालसम्म ४० हजार ९०० भन्दा बढी मानिस मारिएका छन् ।
