१० असोज , एजेन्सी ।
स्पेनिस ला लिगामा क्याटालन जायन्ट बार्सिलोनाले आफ्नो शतप्रतिशत जित यात्रालाई कायम राखेको छ । बार्सिलोनाले बुधबार राति घरेलु मैदानमा गेटाफेविरुद्ध १–० को जित निकालेको हो । बार्सिलोनाको जितमा फरवार्ड रोवर्ट लेवान्डोवस्की नायक बने ।
उनले १९औँ मिनेटमा गरेको गोल नै क्याटालन क्लबलाई तीन अंक जोड्न पर्याप्त बन्यो । ला लिगामा बार्सिलोनाको यो सातौँ जित हो । तालिकाको शीर्ष स्थानमा आसीन बार्सिलोनाको २१ अंक छ ।
त्यो दोस्रो स्थानको रियाल मड्रिडको भन्दा चार अंक धेरै हो । रियालले सात खेलबाट १७ अंक जोडेको छ । समान खेलबाट चार अंकको गेटाफे १९औँ स्थानमा छ । यता इङ्ग्लिस लिग क्लबमा आर्सनल र लिभरपुल विजयी भएका छन् ।
हिजो भएको खेलमा आर्सनलले तेस्रो श्रेणीको क्लब बोल्टन वान्डर्सलाई ५–१ ले पराजित गरेको हो । आर्सनलका लागि इथान नवानेरीले दुई तथा डेक्लान राइस, रहिम स्टर्लिङ र काभ हाभार्टले एक–एक गोल गरे ।
बोल्टनका आरोन जोन कोलिन्सले एक गोल फर्काए । यस्तै अर्को खेलमा लिभरपुलले वेष्टहम युनाइटेडलाई ५–१ ले नै हरायो । लिभरपुलका लागि डिएगो जोटा र कोडी गाक्पोले २–२ गोल गर्दा मोहमद सालाहले एक गोल गरे ।
प्रिमियर लिगका आर्सनल र लिभरपुल फराकिलो अन्तरको जीत निकाल्दै इङ्ग्लिस क्लबको चौथो चरणमा प्रवेश गरेका छन् । चौथो चरणमा अब लिभरपुलले ब्राइटनको भ्रमण गर्नेछ ।
यस्तै आर्सनलले प्रेस्टनसँग खेल्नेछ भने प्रिमियर लिगका दुई क्लब म्यानचेष्टर सिटी र टोटनहम खेल्नेछन् । म्यानचेष्टर युनाइटेडले लेस्टरसँग तथा चेल्सीले विम्बलडन र न्युकासलबीचको विजेतासँग खेल्नेछ ।
इपिएलमा खराब प्रदर्शन गरिरहेको म्यानचेष्टर युनाइटेडले युरोपा लिगको यात्रा बराबरीबाट सुरुवात गरेको छ । युरोपा लिगमा बुधवार आफ्नो पहिलो खेलमा युनाइटेड नेदरल्यान्ड्सको एफसी ट्वेन्टीसँग १–१ को बराबरीमा रोकियो ।
घरेलु मैदान ओल्ड ट्राफोर्डमा क्रिष्टियन एरिक्सेनको गोलमार्फत ३५औं मिनेटमा युनाइटेडले अग्रता बनायो । भ्रमणकारी टोलीका साम लामर्सले ६८औं मिनेटमा गोल गर्दै खेल बराबरीमा ल्याएका हुन् ।
बराबरीबाट सुरुवात गरेको युनाईटेड १ अंकका साथ दशौं स्थानमा छ । ईपिएलमा ५ खेलमा २ मात्र जितका साथ युनाईटेड ७ अंकसहित ११औं स्थानमा छ ।
