२० असोज , एजेन्सी ।
नेपालीहरुको महान चाड बडादशैं भित्रिसकेको छ । देशभित्र र बाहिर सबै नेपालीहरु दशैंकै तयारीमा छन् । कोही दशैंमा घर पुग्ने क्रममा छन् भने कोही आफू रहेकै स्थानमा घरपरिवारबाट टाढै रहेर दशैं मनाउने तयारीमा छन् ।
दशैंले अमेरिकामा रहेका नेपालीहरुलाई पनि छोपेको छ । दशैंकै अवसरमा विभिन्न स्थानमा दशैं महोत्सवहरु आयोजना भईरहेका छन् । तर यसपटक अमेरिकामा रहेका नेपालीहरुका लागि दशैं केही खल्लो छ ।
कारण अहिलेसम्म बेपत्ता रहेकी ममता काफ्ले । यसको सबैभन्दा बढी असर ममताको बसोबास रहेको भर्जिनियाको मनाससमा परेको छ । त्याहा आयोजना गरिएको दशैं महोत्सवमा पनि ममतालाई नै स्मरण गरिएको अमेरिकी संचारमाध्यामहरुले उल्लेख गरेका छन् ।
ममताकै शोकमा रहेका उनका समर्थकहरूले मनाससमा नेपाली महोत्सवमा उनको न्यायका लागि दबाब दिन एक जुट हुन् आह्वान गरिरहेका छन् । ममताको बेपत्ताको लामो समय भइसक्यो ।
प्रत्येक दिन बित्दै जाँदा, उनका साथीहरू, परिवार र अपरिचितहरू समेत ममता काफ्लेलाई न्याय दिलाउन कटिबद्ध छन । मानसास पार्ककी बेपत्ता आमाका रुपमा चिनिएकी ममता अहिलेसम्म मृत मानिन्छ ।
तर प्रहरीले यसको ठोस प्रमाण अहिलेसम्म फेला पार्न सकेको छैन् । ममताका समर्थकहरूले मनाससमा दशैं तिहार मोहत्सवको आयोजना गरेका थिए, जहाँ उनीहरूले शनिबार ममताको न्यायका लागि सचेतना जगाएका छन् ।
महोत्सवले नेपाली संस्कृति र परम्परालाई उजागर गर्ने सामग्रीहरुका स्टलहरु राखिएका थिए । महोत्सवमा सहभागी एक अमेरिकीन स्वयंसेवक महिलाले भनेकी छन्, केही गर्न सकिएन् तर जबदेखि उनी बेपत्ता छिन् ममतासँग जोडिएको महसुस गरिरहेको छु ।
उनले थप भनेकी छन्, “व्यक्तिगत रूपमा मेरो लागि, मेरी छोरी ममता भन्दा दुई वर्ष जेठी छिन्,“ “जब मैले पहिलो पटक उनको कथा अगस्टको सुरुमा बाहिर आउँदै गरेको देखे, त्यले मलाई मलाई रेल जस्तै हिर्कायो।“
कोसात्का नामकी ती महिला टेन्डर हार्ट्स फाउन्डेसनमा स्वयंसेवा गर्दै आएकी छिन् । अमेरिकी संचारमाध्यामसँग उनले भनेकी छन्, “यो एउटा संस्था हो जसले नेपालका अमेरिकामा रहने अन्यायमा परेका महिलाहरूलाई मद्दत गर्दैआएको छ ,“ उनले ममता घरेलु हिंसाको दुखद परिणाम रहेको समेत बताएकी छन् ।
ममताको हत्या गरी शव व्यवस्थापन गरेको आरोप लागेका उनका पति नरेश भट्ट अक्टोबर १० मा सुनुवाइ हुनुअघिसम्म जेलमा नै रहने छन्। भट्टलाई ममताको हत्या गरेको आरोप लगाइएको छ तर उनको शव लुकाएको आधिकारिक रूपमा अभियोग लगाइएको छैन् ।
जुन अझै पत्ता लागेको छैन। बचाव पक्षले उनी अझै बेपत्ता हुन सक्ने तर्क गरिरहेको छ । हिरासतमा रहेका उनका पति नरेश आउँदो बिहीबार पुनः अदालतमा उपस्थित हुनेछन् । उनका वकिलले पक्राउ पुर्जी खारेज माग गर्दै रिट निवेदन दर्ता गराएका छन् ।
पछिल्लो समय मनासस पार्क प्रहरी प्रमुख मारियो लुगोले नरेश भट्टविरुद्धको मुद्दा प्रमाणमा आधारित भएको स्पष्ट पारेका छन् । उनले नरेशविरुद्ध थप प्रमाण समेत भेटिएको बताएका छन् । यसबीचमा १० वटा भन्दा बढी स्थानमा ममता हराएको विषयमा खोजी गरिएको पनि उनले बताएका छन् ।
यसक्रममा ३० वटा सर्च वारेन्टका लागि निवेदन दिएको पनि उनले बताएका छन् । यसमध्ये नरेशविरुद्ध भेटिएको एक भिडियोलाई बलियो प्रमाणका रुपमा हेरिएको उनले बताएका छन् । उनले केही मानिसहरूले सामाजिक सञ्जालमा ममता अझै जीवित नै रहेको दाबी गरिरहेपनि उनी जीवित नरहेको बताएका छन् ।
यद्यपि त्यसलाई प्रमाणित गर्ने कुनै आधार भने नरहेको उनको भनाइ छ । ममतको हत्यामा नरेशकै हात रहेकोमा अमेरिकी प्रहरी विश्वस्त छ , तर उनका विरुद्ध त्यो आरोप पुष्टि हुने बलियो प्रमाण उसले फेला पार्न सकेको छैन् ।
ममता प्रकरणमा मनासस प्रहरीले संघीय अनुसन्धान ब्यूरो एफबीआइको समेत प्राविधिक सहयोग लिएर अनुशन्धान गरिरहेको जनाएको छ । नर्स पेशमा आवद्ध रहेकी २८ वर्षीया ममता हराएको भन्दै उनका पति नरेश भट्टले गत अगस्ट ५ मा प्रहरीमा उजुरी दर्ता गराएका थिए ।
तर, उनीबाहेक अन्यले ममतालाई अन्तिम पटक जुलाई २८ मा देखेका थिए । प्रहरीले नरेशलाई गत अगस्त २२ मा पक्राउ गरेको थियो । उनी अझै पनि प्रहरी हिरासतमा नै रहेका छन् । उनलाई अमेरिकी अदालतले समाजका लागि खतराका रुपमा हेर्ने गरेको छ ।
