विराटनगर,असोज १६
नेकपा संसदीय दलको बैठकमा बहुसंख्यक सांसदले १ नम्बर प्रदेशको राजधानी विकेन्द्रीत गर्ने नहुने राय व्यतm गरेका छन् । उनीहरु मुख्यमन्त्री शेरधन राईले राजधानी विकेन्द्रीत गर्नु पर्ने धारणप्रति असहमति जनाउदै त्यसको विपक्षमा उभिएका हुन् ।
उनीहरुले प्रदेशको नाम पहिचानलाई समेटेर किराँत कोशी वा किराँत सगरमाथा राख्नुपर्ने धारणा राखेका छन् । प्रदेशको नाम र राजधानीको टुंगो लगाउन विराटनगरमा दुईदिनसम्म बसेको नेकपाको बैठकमा बोल्ने ५४ जना सांसद मध्ये ५२ जनाले विकेन्द्रीकरणको विपक्षमा आफनो धारणा राखेका हुन् ।
विराटनगरस्थित फन एण्ड फुड भिलेज रिसोर्टमा बसेको बैठकमा सोमबार पहिलो दिन २ जना सांसदले आफ्नो धारणा राखेको भए । मंगलबार ५२ जना सांसदले प्रदेशको नाम र राजधानीको विषयमा आफ्नो धारणा राखेका थिए । ‘अधिकांश सांसदहरुले प्रदेशको राजधानी विकेन्द्रीत गर्ने विषयमा भने असहमति राखेको एक सांसदले बताएका छन् ।
दलको बैठकमा उठेका विषयमा बाहिर नबोल्न सांसदहरुलाई मुख्यमन्त्री तथा संसदीय दलका नेता शेरधन राई र पार्टीका इन्चार्ज भीम आचार्यले निर्देशन दिइएको बताइएको छ ।यद्यपि अनौपचारिक कुराकानीका क्रममा सांसदहरुले प्रदेशको राजधानी इटहरी आसपास बनाउनु पर्ने र कार्यपालिका र व्यवस्थापिका एकै ठाउँ हुनुपर्नेमा जोड दिएको बताएका छन् ।
मंगलबारको बैठकमा पाँच जना सांसद र प्रदेश सरकारका मन्त्रीहरुले बोल्न बाँकी रहेको छ । नेकपा संसदीय दलका प्रमुख सचेतक बुद्धिकुमार राजभण्डारीले मंगलबारको बैठकमा प्रदेश इन्चार्ज भीम आर्चायले अन्तिममा आफनो राय राखेपछि बैठक स्थिगित भएको थियो ।अर्को बैठकको मिति तय भएको छैन ।
मुख्यमन्त्री शेरधन राईले अर्को बैठकको मिति तय गरेपछि पुनः दलको बैठक बस्ने राजभण्डारीले जानकारी दिए । प्रदेशसभामा रहेको दुईतिहाई मतले प्रदेशको नाम र राजधानीको टुंगो लगाउने संवैधानिक प्रावधान छ । नेकपाको संसदीय दलको बैठकले प्रदेशको नाम र राजधानीको विषयमा गर्ने निर्णय नै अन्तिम हुनेछ ।
प्रदेश सभाको यही अधिवेशनबाट प्रदेशको नाम र स्थायी राजधानी टुग्याउने पक्षमा प्रदेश सरकार रहेको छ । सम्भव यही सात भित्र बस्ने प्रदेश सभा बैठकबाट नाम र स्थायी राजधानी प्रदेश नं १ ले पाउने छ ।
