२८ साउन , काठमाण्डौ ।
अमेरिकाको टेक्सास राज्यमा मंगलबार दिउँसो युनियन प्यासिफिक रेलका ३५ डिब्बा लिकबाट बाहिर खसेका छन् । फोर्ट वर्थबाट लगभग १०० किलोमिटर दक्षिणपश्चिममा रहेको गोर्डन सहरको पूर्वमा यो दुर्घटना भएको हो ।
यस घटनामा कोही पनि घाइते भएको रिपोर्ट आएको छैन । न त कुनै क्षेत्रलाई खाली गराइएको छ । स्थानीय मिडियाको फुटेजमा धेरै डिब्बाहरू एकअर्काको माथि रहेको र नजिकैको क्षेत्रको घाँसमा आगो लागेको देखिन्छ ।
आगोका कारण धुवाँ उडिरहेको पनि देखिन्छ । दुर्घटनालाई खतरनाक अवस्थाको रूपमा हेरिएको पेलो पिन्टो काउन्टी इमरजेन्सी सर्भिसेज डिष्ट्रिक्टले भनेको छ ।
तर, रेलका डिब्बाहरूमा के लोड गरिएको थियो भन्ने कुरा अझै स्पष्ट भएको छैन । अधिकारीहरूका अनुसार कुनै पनि डिब्बाबाट सामान चुहिएका छैनन् ।
युनियन प्यासिफिकका प्रवक्ता रोबिन तिस्वारका अनुसार स्थानीय समय अनुसार दिउँसो २ बजे दुर्घटना भएको थियो । दुर्घटनाको कारण अहिले थाहा हुन सकेको छैन ।
रेलवे र स्थानीय प्रशासनले संयुक्त अनुसन्धान सुरु गरेको छ । रेल यातायात पुनस्र्थापित गर्न रेलका कोचहरू हटाउने र ट्र्याक मर्मत गर्ने काम चाँडै सुरु हुने बताइएको छ ।
यसैबीच, अधिकारीहरूले मानिसहरूलाई दुर्घटना क्षेत्रबाट टाढा रहन अपिल गरेका छन् । यता एयर इन्डियाले दिल्लीबाट अमेरिकाको वासिङ्टन डीसी जाने उडान बन्द गर्ने निर्णय गरेको छ ।
यो सेवा १ सेप्टेम्बर २०२५ देखि बन्द हुने बताइएको छ । एयर इन्डियाका २६ बोइङ ७८७–८ विमानहरूको स्तरोन्नति (अपग्रेड) भइरहेका कारण धेरै विमानहरू लामो दूरीका उडानहरूका लागि उपलब्ध नहुने बताइएको छ ।
यो कार्य २०२६ को अन्त्यसम्म चल्नेछ । पाकिस्तानको हवाई क्षेत्र बन्द रहेकाले पनि लामो दूरीका उडानहरूमा समस्या भइरहेको बताइएको छ ।
एयर इन्डियाले सेप्टेम्बर १ पछिको बुकिङ गरेका यात्रुहरूसँग सम्पर्क गरी उनीहरूलाई वैकल्पिक उडानमा बुकिङ वा पूर्ण रकम फिर्ता लिने विकल्प प्रदान गर्ने बताएको छ ।
यद्यपि, यात्रुहरूले एयर इन्डियाका इन्टरलाइन साझेदारहरूमार्फत न्युयोर्क, सिकागो वा सान फ्रान्सिस्को हुँदै वासिङ्टन डीसी पुग्नसक्ने बताइएको छ ।
एयर इन्डियाले हाल उत्तर अमेरिकाका ६ वटा सहरहरूमा नन–स्टप उडानहरू सञ्चालन गरिरहेको छ । जसमा क्यानाडाको टोरन्टो र भ्यानकुभर पनि समावेश छन् ।
दुई महिनाअघि जुन १२ मा अहमदाबादमा एयर इन्डियाको एक विमान दुर्घटनाग्रस्त भएको घटनापछि विमानहरूको जाँच र स्तरोन्नतिको प्रक्रिया तीव्र रूपमा चलिरहेका कारण यो निर्णय आएको बताइएको छ ।
यसैबीच भारतमा तिर्थयात्रीहरु बोकेको एक सवारी साधन दुर्घटनामा पर्दा ठूलो मानविय हताहति भएको छ । राजस्थान राज्यको दौसामा भएको सडक दुर्घटनामा १० जनाको मृत्यु भएको छ ।
अन्य २० जना घाइते भएका छन् । मृतकमध्ये सात महिला र तीन बालबालिका छन् । गम्भीर घाइतेमध्ये आठ जनालाई जयपुरको एसएमएस अस्पतालमा पु¥याइएकामा तीमध्ये पाँच जनालाई आईसीयूमा भर्ना गरिएको छ ।
दुर्घटना खाटु श्याम मन्दिरबाट फर्कने क्रममा आझ बिहान करिब ३ बजे भएको हो । पिकअप र ट्रेलर ठोक्किएर दुर्घटना भएको भारतीय सञ्चारमाध्यमले जनाएका छन् ।
गम्भीर घाइते पनि रहेकाले मृतकको संख्या बढ्न सक्ने अनुमान गरिएको छ । मृतकहरू भारतको उत्तर प्रदेशको एटाका बासिन्दा भएको बताइएको छ ।
