१५ असोज , काठमाण्डौ ।
दशैंका अवसर पारेर तीन नेपाली चलचित्र प्रदर्शन भएका छन् ।फूलपातीदेखि चलचित्र ‘हरिबहादुरको जुत्ता’, ‘माइतीघर’ र ‘बलिदान’ नेपालभर प्रदर्शनमा आएका हुन् ।
तर दशैंको बिदामा दर्शक तान्ने अवसर भएपनि तीन वटै चलचित्रले घरेलु बजारमा अपेक्षाकृत व्यापार भने गर्न सकेका छैनन् । चलचित्र विकास बोर्डको ‘बक्सअफिस २ सिनेमा’ एपमा चलचित्र ‘बलिदान’ ले दुई दिनमा एक करोड पाँच लाख ६५ हजार रुपैयाँबराबरको व्यापार (ग्रस कलेक्सन) गरेको तथ्याङ्क छ ।
उक्त चलचित्रले पहिलो दिन असोज १३ गते नेपालभर प्राप्त गरेको २४४ ‘शो’ बाट ५७ लाख १९ हजार ३४० र दोस्रो दिन दुई सय १३ शोबाट ४८ लाख ४६ हजार रुपैयाँको व्यापार गरेको छ ।
सन्तोष सेनको निर्देशनमा तयार भएको चलचित्र ‘बलिदान’ मा समीर भट्ट, सौगात मल्ल, अर्पण थापा, ऋचा शर्मालगायत कलाकारले अभिनय गरेका छन् ।
यस्तै, अभिनेता हरिवंश आचार्यले शीर्ष भूमिका निर्वाह अभिनय गरेको चलचित्र ‘हरिबहादुरको जुत्ता’ ले प्रदर्शनको दुई दिनमा ५९ लाख ५८ हजार रुपैयाँको व्यापार (ग्रस कलेक्सन) गरेको छ ।
उक्त चलचित्रले असोज १३ गते १३४ शोबाट २४ लाख ८५ हजार ६४ र दोस्रो दिन ३४ लाख ७३ हजारको व्यापार (ग्रस कलेक्सन) गरेको छ । उक्त चलचित्रले पहिलो दिन र दोस्रो दिन समान ‘शो’ पाएको छ ।
दीपेन्द्रकुमार खनालको निर्देशनमा तयार भएको चलचित्र ‘हरिबहादुरको जुत्ता’ मा अभिनेता आचार्यसँगै स्वस्तिमा खड्का, प्रकाश सपुत, प्रियङ्का कार्की, हरिहर शर्मा, दिव्य देव, किरण केसी, राजाराम पौडेललगायतका कलाकारले अभिनय गरेका छन।
अभिनेता आचार्यले टेलिशृङ्खला र रङ्गमञ्चमा निर्वाह गरेको चर्चित पात्र ‘हरिबहादुर’ लाई यसपटक चलचित्रमा ल्याइएको हो ।प्रदर्शनरत तेस्रो चलचित्र ‘माइतीघर’ ले प्रदर्शनको दुई दिनमा ३८ लाख ६३ हजारको व्यापार (ग्रस कलेक्सन) गरेको छ ।
उक्त चलचित्रले असोज १३ गते पहिलो दिन १४४ ‘शो’बाट १८ लाख ९६ हजार ४५५ र दोस्रो दिन १३० ‘शो’बाट १९ लाख ६७ हजार रुपैयाँको व्यापार (ग्रस कलेक्सन) गरेको तथ्याङ्क चलचत्र विकास बोर्डको ‘बक्सअफिस २ सिनेमा’ एपमा छ ।
रोहित अधिकारीले निर्माण तथा मिलन तामाङले निर्देशन गरेको यो चलचित्रमा केदार घिमिरे, उपासनासिंह ठकुरी, धीरज मगर, प्रकाश सपुतलगायत कलाकारले अभिनय गरेका छन ।
पछिल्ला वर्षमा दशैंमा नेपाली चलचित्रको व्यापार राम्रो भएको पाइएको छ । सोही कारण यो दशैंमा तीन चलचित्रले प्रदर्शन मिति तय गरेका हुन् ।
बिदाको समयमा चलचित्रले राम्रो प्रतिक्रिया पाएमा त्यसको व्यापार बढ्ने अपेक्षाले चाडपर्व केन्द्रित प्रदर्शन हुनेक्रम बढेको चलचित्रकर्मीको भनाइ छ ।
समीर भट्ट अभिनित नेपाली चलचित्र बलिदानलाई दर्शक र समीक्षकहरूले निकै सकारात्मक रूपमा मूल्यांकन गरेका छन्। यो चलचित्र सामाजिक र देशभक्तिपूर्ण कथावस्तुलाई केन्द्रमा राखेर निर्माण गरिएको छ ।
जसले दर्शकलाई भावनात्मक रूपमा जोड्न सफल भएको छ।चलचित्रमा समीर भट्ट,ऋचा शर्माको अभिनय दमदार छ भने उनको एक्सन र संवादले दर्शकलाई प्रभावित पारेको छ।
फिल्ममा सौगात मल्ल, अर्पण थापा लगायतका कलाकारहरूको पनि प्रभावकारी अभिनय रहेको देखिएको छ। कथा र प्रस्तुतीकरण दुवै पक्षले मजबुती दिएको यो चलचित्रले नेपालमा नयाँ स्तरको मनोरञ्जन दिएको दर्शकहरुले प्रतिक्रिय दिएका छन्।
यसले दक्षिण भारतीय चलचित्रको स्वाद दिएको प्रतिक्रिया आइरहेको छ । दर्शकहरूले चलचित्रलाई गहिरो भावनात्मक असर गर्ने र देशप्रेमलाई जागृत गर्ने शैलीमा प्रस्तुत गरिएको बताएका छन्।
चलचित्रमा आमाबाबुको प्रेम र बलिदानको कथाले दर्शकको मन छोएको छ र केही दर्शकले आँसु थाम्न नसकेको प्रतिक्रिया समेत दिएका छन् ।
चलचित्रको दोस्रो भाग बन्नुपर्ने चाहना पनि केही दर्शकहरूले व्यक्त गरेका छन्। चलचित्रले देशभक्ति, व्यक्तित्वको संघर्ष र सामाजिक यथार्थलाई प्रभावकारी रूपमा प्रस्तुत गरेको छ ।
यस्तै चलचित्र हरिबहादुरको जुत्तामा हरिवंश आचार्यले मुख्य भूमिका निर्वाह गरेका छन् र यो चलचित्र कमेडी र राजनीतिक विषयवस्तुको मिश्रण हो।
चलचित्रको कथा आजको युवापुस्ताले उठाएका मुद्दाहरूसँग गहिरो सम्बन्धित छ र यो भ्रष्टाचार, नेतामन्त्रीहरूको राजनीतिसँग जोडिएको छ।
चलचित्रले नेपाली समाजको राजनीतिक परिदृश्यलाई कमेडियन तरिकाले प्रस्तुत गरेको छ तर यसमा केही गम्भीर सामाजिक सन्देश पनि समेटिएको छ।
चलचित्रमा हरिवंश आचार्यको अभिनयलाई विशेष प्रशंसा गरिएको छ र उनलाई दर्शक तथा समालोचकहरूले नैतिकता र व्यंग्यात्मक शैलीमा नयाँ उचाइँमा पुर्याएको उल्लेख गरेका छन्।
साथै, फिल्मको संगीत, निर्देशन र सम्पादनको पनि प्रशंसा गरिएको छ।अर्काे प्रर्दशनरत केदार घिमिरे अभिनित नेपाली चलचित्र माइतीघर सामाजिक र सांस्कृतिक विषयलाई केन्द्र बनाएर निर्माण गरिएको छ।
यो चलचित्र समुदायिक जीवनशैली, संस्कृतिलाई कथाको मूल धारामा राखेर प्रस्तुत गरिएको छ। फिल्मले प्रेम, विछोड, सांस्कृतिक द्वन्द्व र पारिवारिक सम्बन्धलाई समेटेको छ।
केदार घिमिरेको कमेडी र अभिनय विशेष प्रभावकारी रहेको छ र फिल्मले दर्शकलाई मनोरञ्जनका साथै भावनात्मक रूपमा पनि जोड्ने प्रयास गरेको छ
