विराटनगर, माघ २
मोरङ प्रहरीले कानुन विपरीत बालश्रमिकका रुपमा काममा लगाइएका ६ जना बालकलाई उद्धार गरेको छ । प्रहरीले १ नेपाली सहित ५ जना भारतीय बालकहरुलाई उद्धार गरेको हो ।
प्रहरीले उनीहरुलाई मोरङको कटहरी गांउपालिका ५ स्थित कृष्णप्रणाम इट्टा भट्टाबाट उद्धार गरेको हो । उद्धार गरिएका बालकहरुमा कटहरी गाँउपालिका वडानम्बर ६ का १३ बर्षिय मोहन सरदार, भारत बंगालका १६ बर्षिय रुबेल मियां, १४ बर्षिय राजकुमार विश्वास, १६ बर्षिय कासनकुमार विश्वास, १६ वर्षका काउछ आलम तथा भारत बंगालकै ११ बर्षिय रुबेल मियां रहेका छन् ।
प्रहरीले बालकहरुको उद्धारसंगै इट्टा उद्योगका संचालक फणिन्द्रबहादुर ढकाललाई समेत नियन्त्रणमा लिएको छ । जिल्ला प्रहरी कार्यालय मोरङ र बालबालिकाको क्षेत्रमा कामगर्ने सिबिनका पदाधिकारी सहितको टोली इट्टा भट्टामा पुग्दा १६ बर्ष मुनिका धेरै बालबालिका कांचो इट्टा बनाउने र लोडगर्ने काममा खटिएको भेटिएका थिए ।
उद्धार गरिएका बालकहरुलाई संरक्षणका लागि विराटनगरस्थित पूर्वाञ्चल बाल आश्रममा राखिएको जिल्ला प्रहरी कार्यालय मोरङका प्रमुख एसपी मनोजकुमार केसीले बताए । नियन्त्रणमा लिइएका ढकाललाई भने थप कारवाहीका लागि श्रम कार्यालयको जिम्मा लगाइने एसपी केसीले बताए । अधिकाँश ईटा भट्टामा जानेहरु दलित तथा निम्न वर्गका छन् ।
कति मानिसहरु अहिले यो पेशामा निर्भर छन् भन्ने तथ्यांक कसैसँग छैन । आर्थिक स्तर कमजोर हुनु, चेतनाको स्तरमा वृद्धि नहुनु, अशिक्षा जस्ता कारणले पनि ईटा भट्टामा जानेको संख्या दिनानुदिन बढ्दै गएका छन् ।
