विराटनगर, वैशाख २६
लाखौ रुपैयाँ खर्च गरेर सञ्चालनमा ल्याइएको विराटनगर महानगरपालिकाको खाद्य अनुसन्धान ल्याब उपयोगविहीन अवस्थामा रहेको पाइएको छ । विराटनगर महानगरपालिकामा खाद्य अनुसन्धान शाखा रहेपनि कर्मचारी अभावमा ल्याब लथालिंग बनेको छ । महानगरको बेवास्ताका कारण खाद्य परीक्षणका उपकरण यतिबेला धुलो र माकुराको जालोले जेलिएका कारण कवाडीमा परिणत हुने खतरा बढ्दै गएको छ ।
तत्कालीन विराटनगर उपमहानगरपालिकाले बजारको खाद्य वस्तु अनुगमन र गुणस्तरीयता परिक्षणका लागि ल्याब स्थापना गरेको थियो । तर, अहिले जनपतिनिधिहरु निर्वाचित भएर आइसकेको अवस्थामा पनि सो ल्याब नाम मात्रको बनेको छ । खाद्य अनुसन्धान शाखाभित्रको ल्यावमा खाद्य वस्तु परीक्षणका लागि आवश्यक विभिन्न उपकरण रहेपनि त्यसको सदुपयोग हुन सकेको छैन ।
महानगरपालिकाले ल्याब सञ्चालनका लागि ध्यान नदिँदा त्यहाँ रहेका लाखौँ रुपैयाँ मूल्यका उपकरणहरु दिन प्रतिदिन जिर्ण बन्दै कबाडीमा परिणत हुँदै जाने खतरा बढेको देखिन्छ । बजारमा दिनहुँजसो अखाद्य वस्तुहरु विक्रि वितरण गर्ने गरेको नगरवासीहरुको वारम्वार गुनासा आइरहेपनि ल्याब मार्फत खाद्य वस्तु परीक्षणमा महानगरको ध्यान गएको छैन । हाल ल्याबमा रहेका विभिन्न परीक्षण उपकरणहरु धुलो र माकुराको जालाले जेलिएका छन ।
त्यति मात्र होइन दराजमा राखिएका उपकरणहरुसमेत अब कवाडी सामानका रुपमा परिणत हुन लागेका छन । अहिले खाद्य अनुसन्धान शाखामा एक जना कर्मचारीहरु समेत छैनन । सो शाखामा प्राविधिकका रुपमा काम गर्दै आएका धिरज राईलाई प्रमुख प्रशासकिय अधिकृतको स्वकीय सचिव बनाइएपछि अझ सो ल्याब लथालिंग बनेको छ । उनै राईले वेलावेलामा उक्त शाखा हेर्ने गरेको महानगरपालिकाले जनाएको छ । खाद्य अनुसन्धान शाखाका कर्मचारी राईले कर्मचारी अभावमा आफुले मात्रै नभई अन्य कर्मचारीहरुले समेत थुपै शाखाका कामहरु गरिरहनुपरेको बताए ।
यता विराटनगर महानगरपालिकाले भने कर्मचारी अभावमा सो ल्याब सञ्चालन गर्न नसकिएपनि सञ्चालनको तयारी गरिरहेको दावी गरेको छ । विराटनगर महानगरपालिकाका प्रबक्ता राजेन्द्र प्रधानले महानगरको ल्याब सञ्चालनमा नरहेपनि नापतौल तथा गुण नियन्त्रण कार्यालय, मोरङ व्यापार संघको समन्वयमा खाद्य वस्तुको परीक्षण र अनुगमन गरिरहेको दावी गरे । उनले स्थानीय सरकार स्थापना भएपछि हाल सम्म कर्मचारी समायोजन भएर आउनेक्रम जारी नै रहेकाले विस्तारै ल्याबलाई व्यवस्थित गरिने बताए ।
उपभोक्त अधिकारकर्मीहरुले भने विराटनगर बजारमा अखाद्य र मिसावटयुक्त खाद्य वस्तुहरु विक्रि वितरण भइरहेपनि ल्याबको सदुपयोग हुन नसक्नु नगरवासीहरुका लागि दुःखद भएको बताएका छन । उपभोक्ता अधिकारकर्मी उत्तम ढुंगेलले लाखौँ रुपैयाँ खर्च गरेर स्थापना गरिएको ल्याब जनप्रतिनिधि रहँदाको अवस्थामा पनि सञ्चालन नहुनु विराटनगरवासीका लागि दुःखद विषय भएको बताए ।
सो ल्याबलाई खाद्य वस्तु परिक्षण योग्य बनाएर सञ्चालनमा ल्याइए जुनसुकै समयमा पनि खाद्य वस्तु परिक्षण गर्न सकिने छ । परीक्षणका लागि महानगरले अरुको मुख ताक्नुपर्ने छैन ।उपकरण संचालनमा आए अखाद्य वस्तुको उपयोग र मिसावटयुक्त खाद्य वस्तु नियन्त्रण भई नगरवासीको स्वास्थ्य माथिको खेलवाड पनि बन्द हुने थियो । यसर्थ यस तर्फ विराटनगर महानगरपालिकाको ध्यान जान जरुरी देखिन्छ ।
