विराटनगर, फागुन ७
सुनसरीकै सर्वाधिक राशीको भलिबल प्रतियोगिता आजबाट सुनसरी सदरमुकाम इनरुवामा सुरु भएको छ । इनरुवामा सुरु प्रथम मेयर कप भलिबल प्रतियोगिताको उपाधी बिजेताले नगद ७० हजारसहित शिल्ड प्राप्त गर्ने छ ।
पहिलो हुने टिमले प्राप्त गर्ने पुरस्कार राशी सुनसरी भलिबलकै सबैभन्दा बढी हो । प्रतियोगितामा दोस्रो हुने टिमले नगर ३५ हजारसहित ट्रफी हात पार्नेछ । सखुवागाछीमा सुरु प्रतियोगितामा आयोजक टिमका साथै इनरुवा नगरपालिका, रामधुनी, डुम्राहा, इटहरी, सुनसरी, मोरङ, भोजपुर, सप्तरी, लहानसहित विभागिय टिमहरु नेपाल पुलिस, शशस्त्र र आर्मीले सहभागिता जनाउँदैछन् ।
उद्घाटन खेल धरान र इटहरीबीच भएको थियो । बेस्ट अफ फाइभका आधारमा खेलाइएको पहिलो खेलमा इटहरी बिजयी भएको छ । पहिलो दुई सेट धरानले जिते पनि त्यसपछि लयमा फर्केको इटहरीले तीन सेट आफ्नो पक्षमा पारेको थियो । प्रतियोगिताको म्यान अफ दि म्याच भने धरानका प्रदिप तामाङ्ग घोषित भए । प्रतियोगिताको इनरुवा नगरपालिकाका प्रमुख राजन मेहताले उद्घाटन गरेका थिए । नगरको पहिचान र खेलकुद बिकासमा योगदानकालागि प्रतियोगिता महत्वपूर्ण सावित हुने नगरप्रमुख मेहताको भनाइ छ ।
