९ मंसिर, विराटनगर । बालसंरक्षणमा महत्वपूर्ण भूमिका खेलेको भन्दै जिल्ला प्रहरी कार्यालय मोरङलाई सिविन नेपालले सम्मान गरेको छ । संयुक्त राष्ट्रसंघ बालअधिकार सम्बन्धी महासन्धिको ३० औँ वार्षिकोत्सव तथा सिविन नेपालको ३२ औँ वार्षिकोत्सवको अवसरमा सोमबार विराटनगरमा आयोजित बालअधिकार समारोहमा जिल्ला प्रहरी कार्यालय मोरङका प्रमुख विश्व अधिकारीलाई सम्मान प्रदान गरिएको हो ।
एसपी अधिकारीलाई समारोहका प्रमुख अतिथी प्रदेश १ का प्रदेश प्रमुख सोमनाथ अधिकारी र सिविन नेपालका अध्यक्ष माधव प्रधानले दोसल्ला ओढाएर कदर पत्र प्रदान गरे । जिल्ला प्रहरी कार्यालय मोरङले बालबालिकासँग सम्बन्धीत विभिन्न संघसंस्थासँग सहकार्य गरी जोखिममा परेका बालबालिकाको उद्धार, राहत, संरक्षण, हराएका बालबालिकाको खोजी तथा पारिवारिक पुनः एकीकरण लगायतमा महत्वपुर्ण भुमिका निर्वाह गरेको जनाईएको छ ।
सम्मानित जिल्ला प्रहरी कार्यालय मोरङका तर्फबाट बोल्दै एसपी अधिकारीले सिविन नेपालको कामको प्रशंसा गरे । उनले आफु प्रहरी सेवामा लागेदेखि नै बालअधिकार तथा मानवअधिकारका क्षेत्रमा काम गर्दै आएको बताउँदै आगामी दिनमा पनि कानुन कार्यान्वयन र बालसंरक्षणमा जोड दिने प्रतिवद्धता व्यक्त गरे । त्यस्तै बालसंरक्षणमा महत्वपूर्ण भूमिका खेलेको पूर्वाञ्चल बाल सेवा आश्रमलाई पनि सम्मान गरिएको छ ।
प्रदेश प्रमुख अधिकारी र सिविन नेपालका अध्यक्ष प्रधानले बाल सेवा आश्रमकी अध्यक्ष सीता पोखरेललाई दोसल्ला ओढाएर कदरपत्र प्रदान गरे । सिविन नेपालले स्थापनाकालदेखि नै बाल संरक्षणको क्षेत्रमा महत्वपूर्ण काम गर्दै आईरहेको छ ।
जिल्ला प्रहरी कार्यालय मोरङ र सिविन नेपालको सहकार्यमा मोरङमा बाल हेल्पलाईन १०९८ सञ्चालित छ ।
