११ मंसिर, एजेन्सी ।
च्याम्पियन्स लिग अन्तर्गत गएराति भएको खेलमा एथ्लेटिको मड्रिडलाई हराउँदै इटालियन क्लव युभेन्टस समूह बिजेता बनेको छ।
गएराति भएको खेलमा युभेन्टसले एथ्लेटिकोलाई १–० ले हराएको हो। युभेन्टसको जितमा पाउलो डिब्यालाले निर्णायक गोल गरे। डिब्यालाले खेलको ४५ औं मिनेटमा गोल गरेका थिए।
त्यस्तै गएराति नै भएको अर्को खेलमा टोटेनहमले उत्कृष्ट प्रदर्शन पुनरागमन गर्दै ओलम्पियाकोसलाई हराएको छ। सुरुमै २–० ले पछि परेको टोटेनहमले उत्कृष्ट पुनरागमन गर्दै ४–२ को जित निकालेको हो।
ओलम्पियाकोसका लागि छैटौं मिनेटमै गोल गर्दै युसुफ इल अरबीले अग्रता बनाएका थिए। त्यस्तै १९ औं मिनेटमा रुबिन सेमेडोले गोल गर्दा ओलम्पियाकोस २–० ले अगाडि रहेको थियो। तर, पहिलो हाफको अन्तिम समयमा डेले अलिले गोलमा टोटेनहमले खाता खोल्यो।
दोस्रो हाफमा ह्यारी केनले गोल गर्दै खेल बराबरीमा ल्याए। उनले खेलको ५० औं मिनेटमा गोल गरेका थिए। त्यस्तै ७३ औं मिनेटमा सर्जी औरियरले गोल गर्दा टोटेनहमले खेलमा अग्रता लियो। र, ७७ मिनेटमा फेरि ह्यारी केनले अर्को गोल थप्दा खेल टोटनहमले ४–२ ले जित्न सफल भयो।
जितसँगै टोटेनहम अघिल्लो चरणमा प्रवेश गरेको छ।
